काठमाडौं– राष्ट्रिय स्वतन्त्र पार्टी (रास्वपा) नेतृत्वको एकल सरकारको तर्फबाट अर्थमन्त्री डा. स्वर्णिम वाग्लेले शुक्रबार संघीय संसदमा आगामी आर्थिक वर्षको बजेट प्रस्तुत गरे ।

डा. वाग्लेले करका दरमा हेरफेरदेखि विगतका धेरै कार्यक्रमलाई निरन्तरता दिँदै २१ खर्ब बढी बजेट प्रस्तुत गरेका छन् । सरकारले ल्याएको बजेटमा भने निजी क्षेत्रले प्रारम्भिक रूपमा सकारात्मक प्रतिक्रिया दिएको छ ।

नेपाल उद्योग वाणिज्य महासंघका अध्यक्ष अन्जान श्रेष्ठले केही वस्तुमा अन्तःशुल्क घटाएको, मध्यम आय हुनेको दायरा बढाएको लगायतका विषय र पूर्वाधारबाट लगानी परिचालन लगायतका विषय सकारात्मक देखिएको बताए ।

तर, विगतदेखि सरकारको प्रतिबद्धता आउने तर कार्यान्वयन गरेर जाने पक्ष मजबुत हुनुपर्ने आवश्यकता रहेको उनले बताए ।

उनले आजको बजेट सुन्दा सरकारले केही न केही नयाँ गरेर अगाडि जान खोजेको जस्तो देखिएको पनि बताए ।

त्यस्तै, नेपाल चेम्बर अफ कमर्सका अध्यक्ष कमलेस अग्रवालले नीतिगत हिसाबले हेर्दा बजेट राम्रो देखिएको र महत्वकांक्षी पनि भएको बताए ।

‘राजस्वमा व्यापक सुधार गरिएको छ, अन्तःशुल्क हटाइएको छ, भन्सारका दरहरू पनि घटाइएका छन्, आयकरका दरमा पनि परिवर्तन गरिएको छ’, उनले भने, ‘नीतिगत हिसाबले हेर्दा बजेट राम्रो छ, बजेट महत्वकांक्षी पनि छ ।’

७ प्रतिशतको आर्थिक वृद्धिदर ६ प्रतिशत महँगी वृद्धिमा सीमित राख्ने कुरामा २० प्रतिशत कर्जा विस्तार हुनुपर्ने आवश्यकता रहेको उनले बताए ।