काठमाडौं– नेपाल एड्भेन्चर रनिङ महासंघले यही वैशाख १९ गते चाँगुनारायण राष्ट्रिय ट्रेल रन आयोजना गर्ने भएको छ ।  

महासंघले बुधबार काठमाडौंमा पत्रकार सम्मेलन गर्दै खेलको विकास र प्रतिभावान् खेलाडीहरू उत्पादन गर्ने उद्देश्यका साथ वैशाख १९ गते चाँगुनारायण राष्ट्रिय ट्रेल रन आयोजना गर्न लागिएको जनाएको हो । 

खुला महिला र पुरुषतर्फ ३६ किलोमिटर र २० वर्ष भन्दा मुनिका युवा महिला र पुरुषतर्फ ७ किलोमिटर दौडमा प्रतिस्पर्धा हुने प्रतियोगितामा २५० भन्दा बढी खेलाडीहरूले भाग लिने महासंघका वरिष्ठ उपाध्यक्ष एवं प्रतियोगिता संयोजक राजन खत्रीले जानकारी दिए  ।

चाँगुनारायण मन्दिरबाट सुरु हुने राष्ट्रिय ट्रेल रनमा त्रिशूल डाँडा, तेलकोट, पञ्चमहालक्ष्मी मन्दिर, मुहानपोखरी लगायतका हाइकिङ ट्र्याक रुटलाई समेटिएको उनले बताए ।

खुला महिला र पुरुषतर्फ ३६ किलोमिटर दौडमा प्रथम हुने खेलाडीलाई रु १ लाख, द्धितिय हुनेलाई ७५ हजार, तृतियलाई रु ५० हजार प्रदान गरिने खत्रीले बताए । 

त्यस्तै २० वर्ष भन्दा मुनिका युवा महिला र पुरुषतर्फ ७ किलोमिटर दौडको प्रथमलाई रु ३० हजार प्रदान गरिने आयोजकले जनाएको छ ।