काठमाडौं- नेपाली कांग्रेसले रामेछाप जिल्ला सभापति पूर्णबहादुर तामाङ ‘कान्छाराम’ लाई अनुशासन उल्लंघनको आरोपमा निलम्बन गरेको छ।

पार्टीको केन्द्रीय अनुशासन समितिको निर्णयअनुसार उनलाई पार्टी नेतृत्वविरुद्ध भ्रमपूर्ण र तथ्यहीन अभिव्यक्ति दिएको भन्दै स्पष्टिकरण सोधिएको थियो।

तर उनले दिएको जवाफ सन्तोषजनक र चित्तबुझ्दो नभएको निष्कर्ष निकाल्दै अन्तिम निर्णय नहुन्जेलसम्मका लागि निलम्बन गरिएको कांग्रेसले जनाएको छ।

समितिका अनुसार, अनुशासन उल्लंघनसम्बन्धी थप अनुसन्धान जारी रहनेछ र सो अवधिभर उनलाई सभापति पदमा काम गर्न नपाउने व्यवस्था गरिएको हो।

यसैबीच, पूर्व कार्यवाहक सभापति पूर्णबहादुर खड्कासँग सम्बन्धित विषयमा भने सर्वोच्च अदालतको पछिल्लो फैसलापछि स्पष्टीकरण सोध्ने औचित्य समाप्त भएको निष्कर्ष निकाल्दै उक्त प्रक्रिया तामेलीमा राखिएको कांग्रेसले जनाएको छ।