काठमाडौं– वर्षा र सहकालका देवता सेतो मच्छिन्द्रनाथको रथ लगनटोल पुर्‍याइएसंगै मच्छिन्द्रनाथको माताको मन्दिर परिक्रमा गरिएको छ ।

 प्रत्येक वर्ष चैत्र शुक्ल अष्टमीदेखि दरबारमार्ग स्थित तीनधारा पाठशालाबाट सुरु हुने वर्षा र सहकालका देवता सेतो मच्छिन्द्रनाथको रथयात्रा तेस्रो दिन हनुमानढोकाबाट तानेर लगन पुर्‍याउने गरिन्छ ।  रथ लगन पुगेसँगै दर्शन एवं पूजा, आराधना गर्न भक्तजनको भीड समेत लागेको छ ।

 लगनमा सेतो मच्छिन्द्रनाथको माताको मन्दिर छ। रथयात्राको तेस्रो दिन हनुमानढोका दरबार क्षेत्रबाट रथ तानेर लगनसम्म लगिएको हो। तेस्रो दिन चिकमुँगल, जैसीदेवल, ज्याबहाल हुँदै लगन लगिने गरी पुर्‍याइएको हो ।

रथयात्रा पहिलो दिन असन र दोस्रो दिन अर्थात् रामनवमीका दिन हनुमानढोका दरबार क्षेत्रमा पुर्‍याउने गरिन्छ । रथयात्रामा सयौँको सहभागिता जुटेको छ । 

रथयात्राका लागि बिहीबार दिउँसो चार बजे केलटोलबाट देवताको खट दरबारमार्ग स्थित तीनधारा पाठशालाअघि लगिएको थियो ।

बेलुकी त्यही रथमा राखी यात्रा सुरु गरिएको सेतो मच्छिन्द्रनाथ रथ व्यवस्थापन समितिले जनाएको छ । अष्टमीका दिन शनिबार कुमारीलाई पनि तीनधारा पाठशाला परिसरमा लगेर रथयात्रा सुरु गरिएको थियो ।

रथजात्राको अन्तिम दिन भोलि मछिन्द्रनाथको मूर्तिलाई रथबाट निकाली खटमा राखी पुन मछिन्द्र बहाल पुर्‍याइने गरिन्छ ।

तस्बिर : नेपाल फोटो लाइब्रेरी