काठमाडौं- सुनसरी जिल्लाको दुहवी नगरपालिका–४ मा फोहोरमैला व्यवस्थापन केन्द्र निर्माणको आइतबार औपचारिक शिलान्यास गरिएको छ।

भारतीय राजदूतावास काठमाडौंका प्रथम सचिव नारायण सिंह र दुहवी नगरपालिकाका मेयर बेदनारायण गच्छदारले संयुक्त रूपमा उक्त केन्द्रको शिलान्यास गरेका हुन् ।

यो परियोजना भारत सरकारको आर्थिक सहयोगमा निर्माण हुन लागेको हो। यसका लागि करिब १६.४ करोड नेपाली रुपैयाँ विनियोजन गरिएको छ।

यो प्रशोधन केन्द्र उच्च प्रभाव सामुदायिक विकास परियोजना अन्तर्गत दुहवी नगरपालिकामार्फत कार्यान्वयन गरिनेछ।

समारोहमा दुहवी नगरपालिकाका मेयर तथा अन्य स्थानीय सरोकारवालाले भारत सरकारको विकास सहयोगको प्रशंसा गरेका थिए।

उनीहरूले यो नयाँ संरचनाले दुहवीमा दिगो र वैज्ञानिक फोहोरमैला व्यवस्थापनलाई प्रवर्द्धन गर्ने तथा स्थानीय वातावरण र जनस्वास्थ्यमा सुधार ल्याउने विश्वास व्यक्त गरे।

भारतीय दूतावासको विज्ञप्तिमा भनिएको छ, ‘नजिकका छिमेकीको रूपमा भारत र नेपालबीच व्यापक तथा बहुक्षेत्रीय सहकार्य रहँदै आएको छ। यस्ता उच्च प्रभाव सामुदायिक विकास परियोजनाहरूले नेपाल सरकारको पूर्वाधार विकास र समृद्धि प्रयासलाई सुदृढ पार्ने भारत सरकारको निरन्तर प्रतिबद्धतालाई प्रतिबिम्बित गर्दछ।’

यो परियोजना भारत सरकारले नेपालमा सञ्चालन गरिरहेका विभिन्न उच्च प्रभाव सामुदायिक विकास परियोजनाहरू मध्ये एक हो, जसमा शिक्षा, स्वास्थ्य र फोहोरमैला व्यवस्थापन जस्ता क्षेत्र समेटिएका छन्।

दुहवी नगरपालिकाका बासिन्दाहरूले यो परियोजनालाई स्थानीय सरसफाइ र वातावरण संरक्षणका लागि महत्वपूर्ण कदमको रूपमा लिएका छन्।

निर्माण कार्य छिट्टै सुरु हुने र तोकिएको समयमा सम्पन्न गर्ने लक्ष्य राखिएको छ। यो सहयोगले नेपाल–भारतबीचको विकास साझेदारीलाई थप मजबुत बनाउने अपेक्षा गरिएको छ।