रसुवा- रसुवास्थित त्रिशूली–३ ‘ए’ जलविद्युत् आयोजनाको सुरुङभित्र फसेका मानिसहरूको उद्धारका लागि सरकारले खोज तथा उद्धार अभियानलाई तीव्र बनाएको छ। सुरुङभित्र मानिसहरू फसेको सूचना पाएपछि विगत दुई दिनदेखि जारी उद्धार प्रयासअन्तर्गत शनिबार बिहानैदेखि सुरुङको प्रवेशद्वार खोल्ने कामलाई थप तीव्र पारिएको हो।

सरकारले प्राथमिकताका साथ सुरक्षा निकायको संयुक्त उद्धार टोली परिचालन गरी सुरुङको प्रवेशद्वारमा थुप्रिएको लेदो तथा भग्नावशेष पन्छाउँदै भित्र प्रवेश गर्ने बाटो खुलाउने प्रयास गरिरहेको छ।

खोज तथा उद्धार कार्यलाई प्रभावकारी बनाउन शुक्रबार रातिदेखि नेपाली सेनाका ६२ जना तथा सशस्त्र प्रहरी बल नेपाल र नेपाल प्रहरीका २० जनासहित ८२ जनाको संयुक्त टोली घटनास्थलमा निरन्तर खटिएको छ।

तर, घटनास्थलमा प्रतिकूल मौसम कायम रहेकाले उद्धार कार्य चुनौतीपूर्ण बनेको छ। सुरुङको मुखमा थुप्रिएको लेदो र भग्नावशेष हटाउनुपर्ने तथा मौसम प्रतिकूल रहेकाले उद्धार टोलीले कठिन परिस्थितिमा काम गरिरहेको अधिकारीहरूले बताएका छन्।

यसैबीच, उद्धार कार्यमा सहयोग गर्न नेपाल आएको भारतीय टोली पनि त्रिशूली पुगेको छ। भारतीय टोलीले हेलिकप्टरमार्फत चिलिमे र लाङटाङ क्षेत्रमा प्रारम्भिक हवाई अनुगमन (रेकी) गर्ने तयारी गरेको छ।

प्रारम्भिक हवाई अनुगमनबाट प्राप्त सूचनाका आधारमा घटनास्थलको अवस्थाको मूल्यांकन गरी आवश्यकताअनुसार थप खोज तथा उद्धार कार्य अघि बढाउने भारतीय टोलीको योजना रहेको छ।

सरकारले सुरुङभित्र फसेकाहरूको उद्धारलाई उच्च प्राथमिकतामा राख्दै उपलब्ध सबै स्रोतसाधन परिचालन गरी उद्धार कार्यलाई निरन्तरता दिएको जनाएको छ।