काठमाडौं- राष्ट्रकवि स्वर्गीय माधवप्रसाद घिमिरेका ज्येष्ठ पुत्र तथा नेपाल विद्युत प्राधिकरणका वरिष्ठ इन्जिनियर इन्दिवर घिमिरे रसुवामा आएको विनाशकारी बाढीपछि बेपत्ता भएका छन्।

नेपाल विद्युत प्राधिकरणको अपर त्रिशूली–३ ‘बी’ जलविद्युत आयोजनाका प्रोजेक्ट म्यानेजरसमेत रहेका घिमिरे भदौ १० गतेदेखि परिवारको सम्पर्कमा नरहेको उनका भाइ इन्जिनियर राजीव घिमिरेले जानकारी दिए।

घिमिरे रसुवाको सिरुपानीस्थित आयोजनाको प्रोजेक्ट साइटमा कार्यरत थिए। भोटेकोशी नदीमा आएको बाढीपछि उनीसँग सम्पर्क हुन नसकेको परिवारले जनाएको छ।

घिमिरेसहित आयोजनास्थल तथा आसपासका क्षेत्रमा रहेका अन्य व्यक्तिहरूको अवस्थासमेत अझै अज्ञात रहेको बताइएको छ। बाढी आएको करिब ७२ घण्टा बितिसक्दा पनि रसुवाको बेत्रावतीदेखि शोले हुँदै उत्तरतर्फ त्रिशूली नदीको खोंचमा रहेका कतिपय बस्ती, बजार तथा जलविद्युत आयोजनासम्म उद्धार टोली पुग्न सकेको छैन।

‘हामी जतिसक्दो छिटो उद्धार होस् भन्ने प्रतीक्षामा बसेको ७२ घण्टा भइसक्यो,’ परिवारका एक सदस्यले भने।

रसुवाको उत्तरगया र गोसाइँकुण्ड गाउँपालिका क्षेत्रमा बाढीले ठूलो जनधनको क्षति पुर्‍याएको अनुमान गरिएको छ। बाढीका कारण त्यस क्षेत्रका विभिन्न जलविद्युत आयोजना, बस्ती तथा भौतिक संरचनामा समेत व्यापक क्षति पुगेको छ।

परिवारले इन्दिवर घिमिरेको खोजी तथा उद्धारलाई प्राथमिकतामा राख्दै तत्काल प्रभावकारी खोज तथा उद्धार अभियान सञ्चालन गर्न सरकारसँग आग्रह गरेको छ।