काठमाडौं– लघुवित्त पीडितहरूले आज बुधबार दोस्रो दिन पनि काठमाडौंको माइतीघरमा धर्ना जारी राखेका छन् । 

लघुवित्तसम्बन्धी विगतका प्रतिवेदन सार्वजनिक गरी कार्यान्वयन गर्नुपर्ने, लघुवित्त, बैंक तथा वित्तीय संस्थाबाट ऋणीमाथि भइरहेको वित्तीय शोषण अन्त्य गर्नुपर्ने, चर्को तथा चक्रवर्ती ब्याज लिन नपाइने, विभिन्न शीर्षकमा असुल गरिने हर्जना र विविध शुल्क खारेज गर्नुपर्ने माग उनीहरूका छन् । 

साथै, जग्गा धितो लिलामी, कालोसूचीमा राख्ने कार्य तथा अन्यायपूर्ण ऋण असुलीको न्यायिक निरूपण गर्न सरकारसँग उनीहरूको माग छ । 

उनीहरूले हिजो मंगलबार बालुवाटारमा धर्ना दिएका थिए । नेपाल राष्ट्र बैंकतर्फ अघि बढेका उनीहरूले प्रहरीले रोकेपछि सडकमै धर्ना बसेका थिए । 

लघुवित्त पीडितहरू न्याय माग्न भन्दै विभिन्न जिल्लाबाट पैदल मार्चपास गरेर काठमाडौं आएका हुन् ।

तस्बिरहरू : नेपाल फोटो लाइब्रेरी