काठमाडौं– कुख्यात रोमन सम्राट कोमोडसले कोलोसियममा ग्लाडिएटर प्रतियोगिता आयोजना गरेको शैलीमा अमेरिकी राष्ट्रपति डोनाल्ड ट्रम्पले पनि ह्वाइट हाउसमा कुश्ती भिडाउने तयारी गरिरहेका छन् ।

अमेरिकी कुश्ती (मिक्स्ड मार्शल आट्र्स) कम्पनी यूएफसीका मालिक डाना ह्वाइटसँग निकट सम्बन्ध रहेका ट्रम्पले जुन १४ मा कुश्ती भिडाउन लागेका हुन् ।

अमेरिकी स्वतन्त्रताको २५० वर्ष पूरा भएको अवसरमा आयोजना हुने कुश्ती प्रतियोगिता आगामी जुन १४ मा हुने तय भएका छ । रोचक कुरा त के छ भने जुन १४ मा जन्मदिन पर्ने ट्रम्प ८० वर्ष पूरा हुँदैछन् ।

अहिले ह्वाइट हाउसमा यूएफसीको तयारी जोडतोडले चलिरहेको छ । ह्वाइट हाउसको दक्षिणी चौरमा ठूला संरचना निर्माणको काम जारी छ ।

यूएफसी २५० नाम दिइएको प्रतियोगितामा दुनियाँका नामी पहलवान भिड्ने तयारीमा छन् । यो प्रतियोगिता हेर्न हजारौँ दर्शक आउने अपेक्षा गरिएको छ ।

कोमोडसले ग्लाडिएटर भिडेजस्तै कुश्तीका ठूला फ्यान ट्रम्प कुनै समय डब्लूडब्लूईमा आफैँ कुश्ती भिड्न पुगेका थिए । ट्रम्प यूएफसीका प्रतियोगिता पनि बारम्बार हेर्न जाने गर्छन् ।

यतिसम्म कि इरानी प्रतिनिधिमण्डलसँग उपराष्ट्रपति जेडी भान्सले पाकिस्तानको इस्लामावादमा शान्ति वार्ता गरिरहेका बेला ट्रम्प चाहिँ कुश्ती हेरिरहेका थिए ।

यसैबीच, बिहीबार सम्पन्न यूएफसी खेलमा नेपालका रवीन्द्र ढाँट विजयी भएका छन् । चीनको मकाउमा भएको प्रतिस्पर्धा अन्तर्गत ब्यान्टमवेट विधाको क्वाटरफाइनलमा भिडेका उनले विपक्षीलाई नकआउट हानेका हुन् ।

फिलिपिन्सका फाइटर किम्बर्ट अलिन्टोजोनसँग भएको प्रतिस्पर्धामा ढाँटले दोस्रो राउन्डमै जित निकालेर सेमिफाइनल यात्रा तय गरेका हुन् । अब उनले जापानी युनोसुके मिनामी र न्यूजील्याण्डका कशिब मोर्डकबीचका विजेतासँग प्रतिस्पर्धा गर्नेछन् ।

यससँगै ढाँटले के अब ट्रम्पले ह्वाइट हाउसमा आयोजना गर्न लागेको यूएफसीमा प्रतिस्पर्धा गर्न पाउलान् भन्ने चासो उत्पन्न भएको छ ।

यूएफसीका अनुसार ढाँटले प्रतिस्पर्धा गरेको यो प्रतियोगिता यूएफसीको आधिकारिक करार प्राप्त गर्ने बाटो मात्रै हो ।

प्रतियोगितामा उत्कृष्ट प्रदर्शन गर्नेले यूएफसीको कन्ट्राक्ट प्राप्त गर्नेछन् । त्यसैले, ढाँटले यो प्रतियोगितामा विजयी हासिल गरेपनि ह्वाइट हाउसमा प्रतिस्पर्धा गर्न भने पाउने छैनन् ।