दुबई– इरान युद्धपछि कायम गरिएको नाजुक युद्धविराममाथि फेरि प्रश्न उठ्ने गरी कुवेतले बिहीबार आफूले मिसाइल तथा ड्रोन आक्रमणको सामना गरेको जनाएको छ । अमेरिकाले इरानमाथिको सैन्य दबाब बढाइरहेको र तेहरानले त्यसको प्रतिकार गरिरहेको दाबी भइरहेका बेला आएको यो घटनाले मध्यपूर्वको सुरक्षा अवस्था थप संवेदनशील बनेको छ ।

कुवेती सेनाले जारी गरेको संक्षिप्त विज्ञप्तिमा मिसाइल र ड्रोन आक्रमण भएको पुष्टि गरिएको भए पनि कुन स्थान वा संरचनालाई निशाना बनाइएको थियो भन्नेबारे विस्तृत विवरण सार्वजनिक गरिएको छैन । घटनाको जिम्मेवारी पनि तत्काल कसैले लिएको छैन ।

इरान तथा इरानसमर्थित शिया मिलिसियाबाट इराक क्षेत्र हुँदै विगतमा पटक–पटक सुरक्षा चुनौती झेल्दै आएको कुवेतका लागि यो घटना नयाँ चिन्ताको विषय बनेको छ । यसले खाडी क्षेत्रमा फेरि सैन्य तनाव बढ्न सक्ने संकेत गरेको विश्लेषण गरिएको छ ।

यो घटना तेहरान र वासिङ्टनबीच युद्धविराम जोगाउने प्रयास तथा जारी कूटनीतिक वार्ताका बीच भएको हो । तर, ती प्रयासका बाबजुद विश्व ऊर्जा आपूर्तिका लागि अत्यन्त महत्वपूर्ण मानिने स्ट्रेट अफ होर्मुज अझै पूर्ण रूपमा सञ्चालनमा आउन सकेको छैन ।

पर्सियन खाडीको साँघुरो प्रवेशद्वारका रूपमा रहेको उक्त जलमार्गबाट विश्वव्यापी तेल तथा प्राकृतिक ग्यास व्यापारको ठूलो हिस्सा आवतजावत गर्ने गर्दछ । यस क्षेत्रमा देखिएको अवरोधले अन्तर्राष्ट्रिय ऊर्जा आपूर्तिमा असर परेको छ भने आगामी दिनमा ऊर्जा संकट थप गहिरिन सक्ने चेतावनी विज्ञहरूले दिएका छन् ।

यसैबीच, अमेरिकाले इरानलाई उच्च स्तरमा संवर्धन गरिएको युरेनियमको मौज्दात त्याग्न दबाब दिइरहेको छ । इरानले भने आर्थिक प्रतिबन्ध हटाउन र रोक्का गरिएका सम्पत्ति फुकुवा गराएर संकटग्रस्त अर्थतन्त्रलाई राहत दिन खोजिरहेको छ ।

अमेरिकी अधिकारीहरूका अनुसार अमेरिकी सेन्ट्रल कमान्डअन्तर्गतका फौजले स्ट्रेट अफ होर्मुज आसपास खतरा उत्पन्न गरिरहेका चारवटा इरानी एकतर्फी आक्रमणकारी ड्रोन खसालेका छन् । नाम नखुलाइएका अधिकारीहरूले बन्दर अब्बासस्थित इरानी भू–नियन्त्रण केन्द्रमाथि पनि अमेरिकी सेनाले आक्रमण गरेको बताएका छन् ।

इरानको अर्धसैनिक क्रान्तिकारी गार्डले भने राज्य सञ्चालित इरना समाचार एजेन्सीमार्फत बन्दर अब्बास अन्तर्राष्ट्रिय विमानस्थल आसपास भएको आक्रमण स्वीकार गरेको छ । गार्डले उक्त क्षेत्रलाई लक्षित गरी हमला भएको दाबी गर्दै त्यसको प्रतिआक्रमण गरिएको जनाएको छ ।

तर, इरानले जवाफी कारबाही कुन लक्ष्यमा गरिएको हो भन्नेबारे स्पष्ट पारेको छैन । साथै, बन्दर अब्बास क्षेत्रमा भएको सैन्य गतिविधि र कुवेतमा रिपोर्ट गरिएको मिसाइल तथा ड्रोन आक्रमणबीच प्रत्यक्ष सम्बन्ध रहेको वा नरहेको विषय पनि खुल्न सकेको छैन ।