काठमाडौं – पञ्जाब किंग्सले आईपीएलको ४०औं खेलमा राजस्थान रोयल्सलाई २२३ रनको लक्ष्य दिएको छ। नयाँ चण्डीगढस्थित महाराजा यादवेन्द्र सिंह स्टेडियममा भएको खेलमा राजस्थानले टस जितेर पहिले बलिङ गर्ने निर्णय गरेको थियो।

पञ्जाब किंग्सले २० ओभरमा ४ विकेट गुमाउँदै २२३ रन बनायो। टोलीका लागि मार्कस स्टोइनिसले ६२ रनको उत्कृष्ट इनिङ्स खेले भने ओपनर प्रभसिमरन सिंहले ५९ रनको अर्धशतकीय पारी खेले। कप्तान श्रेयस अय्यरले ३० रन जोडे।

राजस्थानका बलरमध्ये यशराज पुंजाले ४ ओभरमा ४१ रन खर्चेर २ विकेट लिए। जोफ्रा आर्चर र नन्द्रे बर्गरले एक–एक विकेट हात पारे।

लक्ष्य पछ्याउँदै राजस्थानले पनि आक्रामक सुरुवात गरेको छ। दुई ओभरको समाप्तिमा बिना कुनै विकेट क्षति ३२ रन बनाएको छ। यशस्वी जयसवाल र वैभव सूर्यवंशी क्रिजमा छन्। वैभवले पहिलो ओभरमै अर्शदीप सिंहको बलमा एक छक्का र दुई चौका प्रहार गरेका थिए।