काठमाडौं – नेपाली कांग्रेस संसदीय दलका नेता भीष्मराज आङ्देम्बेले संसदको अधिवेशन स्थगित गरेर अध्यादेशमार्फत कानुन ल्याउने सरकारको निर्णयलाई ‘अलोकतान्त्रिक कदम’ भन्दै कडा आपत्ति जनाएका छन् ।

उनले लोकतन्त्र केवल प्रक्रिया नभई प्रवृत्ति भएको उल्लेख गर्दै संसद अधिवेशन रोक्ने र अध्यादेश ल्याउने कार्य लोकतान्त्रिक अभ्यासविपरीत भएको टिप्पणी गरेका छन् । उनका अनुसार सरकारले दुई वटा अध्यादेश राष्ट्रपति समक्ष सिफारिस गर्नु गम्भीर र दुःखद विषय हो ।

आङ्देम्बेले संसद नचलेको अवस्थामा तत्काल आवश्यक परे मात्र अध्यादेश ल्याउन सकिने भए पनि अहिले त्यस्तो परिस्थिति नरहेको दाबी गरे । उनले संसद बोलाएर सामान्य विधेयकहरू सहज रूपमा पारित गर्न सकिने अवस्थामा हतारमा अध्यादेश ल्याउनु बलमिच्याइँको राजनीति र सार्वभौम संसदको अपमान भएको आरोप लगाए।

उनले प्रधानमन्त्रीलाई प्रश्न गर्दै आफ्नै पार्टीको बहुमतप्रति नै किन अविश्वास गरिएको हो भन्दै संसदको गरिमा र मर्मको अवमूल्यन भएको बताए।

संवैधानिक परिषदसम्बन्धी विधेयक तथा सहकारी ऐन संशोधनजस्ता महत्वपूर्ण विषयहरू संसदीय बहसबाटै टुंग्याउनुपर्ने उनको भनाइ छ। उनले यी विषयलाई सहमति, संवाद र संसदीय प्रक्रियाबाट समाधान गर्न सकिने स्पष्ट पारे।