काठमाडौं – राष्ट्रिय प्रजातन्त्र पार्टी (राप्रपा)का नेता ज्ञानेन्द्र शाहीले सरकारले संसद् छल्दै अध्यादेशमार्फत विधेयक ल्याउने तयारी गरेको भन्दै आपत्ति जनाएका छन् ।

उनले संसदीय अभ्यासको पालना गर्दै सहकार्यका आधारमा अघि बढ्न प्रधानमन्त्री बालेन्द्र शाहलाई सुझाव दिएका हुन् ।
राप्रपा संसदीय दलका नेता समेत रहेका शाहीले बोलाइएको संसद् स्थगित गरेर अध्यादेशमार्फत शासन सञ्चालन गर्नु प्रजातान्त्रिक मूल्य र संसदीय परम्पराविपरीत भएको बताएका छन् ।

उनले सरकारसँग संसद्मा झण्डै दुईतिहाइ बहुमत रहेको अवस्थामा प्रस्तावित विधेयक सजिलै पारित हुने सम्भावना रहेको उल्लेख गरे । ‘संसदलाई छलेर होइन, सहकार्य गरेर अगाडि बढ्नुहोस्,’ उनले भने, ‘यस्ता गतिविधिले दीर्घकालमा स्वयं प्रधानमन्त्रीलाई नै अप्ठ्यारो पार्न सक्छ।’

शाहीले अध्यादेशमार्फत शासन गर्ने प्रवृत्ति अन्त्य गरी विधेयक संसद्बाटै अघि बढाउन आग्रह गर्दै संसदीय प्रणालीको पूर्ण पालना गर्न सरकारलाई अपिल गरेका छन् ।