काठमाडौँ– सरकारले साना सवारी साधनमा यात्रा गर्ने बालबालिकाको सुरक्षाका लागि नयाँ र कडा मापदण्ड प्रस्ताव गरेको छ । भौतिक पूर्वाधार तथा यातायातमन्त्री सुनिल लम्सालले सवारी दुर्घटनाबाट बालबालिकालाई जोगाउन विशेष सुरक्षा व्यवस्थासहितको निर्णय सार्वजनिक गरेका छन् ।

प्रस्तावित नयाँ व्यवस्था अनुसार अब साना सवारी साधनमा १० वर्षभन्दा कम उमेरका वा १३५ सेन्टिमिटरभन्दा कम उचाइ भएका बालबालिकालाई अनिवार्य रूपमा पछाडिको सिटमा राख्नुपर्नेछ । ती बालबालिकालाई पछाडिको सिटमा पनि सुरक्षित बालमैत्री सिट मा मात्र राख्नुपर्ने प्रावधान अनिवार्य गरिएको छ ।

मन्त्री लम्सालको यो निर्णयले साना सवारीको अगाडिको सिटमा बालबालिकालाई राख्न पूर्ण रूपमा प्रतिबन्ध लगाएको छ । “सवारी दुर्घटनाका बेला अगाडिको सिटमा रहेका बालबालिका बढी जोखिममा पर्ने देखिएकाले सुरक्षाका लागि यो कडाइ गरिएको हो,” मन्त्री लम्सालको निजी सचिवालयले भनेको छ ।

सडक सुरक्षाका अन्तर्राष्ट्रिय मापदण्डलाई समेत ध्यानमा राखेर ल्याइएको यो नियम कार्यान्वयनमा आएपछि बालबालिकाको यात्रा थप सुरक्षित हुने विश्वास सरकारले लिएको छ । यो नियमको उल्लंघन गर्ने सवारी चालकलाई कानुन अनुसार कारबाही गरिने समेत मन्त्रालयले जनाएको छ ।