काठमाडौं-पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकलाई पक्राउ गरेपछि नेकपा एमालेका नेता विष्णु रिमालले सरकारको कदमप्रति आपत्ति जनाएका छन्।

सामाजिक सञ्जालमार्फत प्रतिक्रिया दिँदै रिमालले उक्त पक्राउलाई निन्दनीय कार्यको संज्ञा दिएका छन्।

उनले सामान्यतः कुनै घटना भएपछि संलग्न व्यक्ति फरार हुन सक्ने वा प्रमाण नष्ट हुन सक्ने अवस्था भएमा मात्रै जरूरी पक्राउ पूर्जी जारी गरिने बताए।

‘कुनै घटना घट्यो, घटनामा संलग्न व्यक्ति फरार हुने वा प्रमाण नष्ट हुने अवस्थामा जरूरी पक्राउ पूर्जी जारी हुने हो। अहिले कुनै घटना घटेको छैन, त्यस्तो अवस्था पनि होइन,’ रिमालले उल्लेख गरेका छन्।

उनले गौरीबहादुर कार्की आयोगको प्रतिवेदनका आधारमा पक्राउ गरिएको भए पनि यो ‘जरूरी पक्राउ पूर्जी’ जारी गर्ने अवस्था नभएको दाबी गरे। ‘विषय मिलेन, प्रक्रिया पनि मिलेन, पक्राउ पूर्जी गैरकानुनी छ,’ उनले भने।

रिमालले सरकार प्रतिशोधको राजनीतिमा उत्रिएको आरोप लगाउँदै यसविरुद्ध कानुनी र राजनीतिक प्रतिवाद गरिने बताएका छन्।

पूर्वप्रधानमन्त्री ओली र पूर्वगृहमन्त्री लेखकलाई नियन्त्रणमा लिएपछि विभिन्न राजनीतिक दलका नेताहरूको प्रतिक्रिया आउने क्रम जारी छ।