काठमाडौँ– नेकपा एमालेका सचिव महेश बस्नेतले सरकारले देशमा द्वन्द्वको अवस्था सिर्जना गर्न खोजेको बताएका छन् ।

पार्टी अध्यक्ष केपी शर्मा ओली र पूर्वगृहमन्त्री रमेश लेखक पक्राउ परेपछि सामाजिक सञ्जाल फेसबुकमार्फत उनले यसलाई राजनीतिक प्रतिशोधको पराकाष्ठा भएको टिप्पणी गरेका छन् ।

सचिव बस्नेतले राजनीतिक बन्दी नहुनु लोकतन्त्रको मुख्य सूचक भएको स्मरण गराउँदै सरकारले नेपालको छवि धूमिल बनाउने काम भएको टिप्पणी गर्नुभयो । उनले बालेन नेतृत्वको सरकारले सुधन गुरुङ्गजस्ता अनुभवहीन र विवादित व्यक्तिलाई गृहमन्त्री नियुक्त गरेर अराजकता फैलाएको आरोप लगाए ।

उनले भनेका छन्– ‘बालेन सरकारद्वारा सुधन गुरुङ्गजस्ता अनुभवहीन, अराजक र विवादित व्यक्तिलाई गृहमन्त्री बनाइएको तथा पूर्वप्रधानमन्त्री केपी शर्मा ओली र पूर्व गृहमन्त्री रमेश लेखकलाई गिरफ्तार गरिएको घटनाले देशमा द्वन्द्व बढ्ने अवस्था सिर्जना गरेको छ। यस्ता गतिविधिले राजनीतिक प्रतिशोध र पूर्वाग्रहको झल्को दिन्छ।’

सरकारी सम्पदा र आफ्नै चौकी सुरक्षित राख्न नसक्ने प्रहरी प्रशासन लोकतन्त्रका लागि लडेका नेताहरूलाई समात्न हजारौँको सङ्ख्यामा परिचालन हुनु दुःखद भएको उल्लेख गरेका छन् । उनले यो पक्राउ प्रकरणले देशलाई द्वन्द्वतर्फ धकेल्ने चेतावनी समेत दिएका छन् ।

उनले एमालेको रणनीति, पक्राउको विरोध र लोकतान्त्रिक मूल्य–मान्यताको रक्षाका लागि एमालेले आजैदेखि सडक आन्दोलन सुरु गर्ने उनको घोषणा छ ।

सचिव बस्नेतले प्रतिशोधको राजनीति विरुद्ध एकजुट हुन र प्रदर्शनमा सहभागी हुन कार्यकर्ता तथा आम सर्वसाधारणलाई अपील गरेका छन् ।