काठमाडौं – इरानको शक्तिशाली सैन्य दस्ता इस्लामिक रिभोलुसनरी गार्ड्स कोर आईआरजीसीलेले विश्वकै महत्वपूर्ण तेल पारिवहन मार्ग स्ट्रेट अफ हर्मुज भएर आउजाउ गर्ने जहाजहरूलाई सो क्षेत्रमा प्रवेश नगर्न कडा चेतावनी दिएको छ ।

युरोपेली संघको नौसैनिक मिसनका एक अधिकारीले रोयटर्सलाई दिएको जानकारी अनुसार इरानी सेनाले रेडियो सन्देशमार्फत त्यस मार्गबाट कुनै पनि जहाजलाई अघि बढ्न अनुमति नभएको बताएका छन् ।

अमेरिका र इजरायलले इरानमाथि संयुक्त सैन्य कारबाही सुरु गरेपछि आईआरजीसीले यस्तो चेतावनी दिएको हो । इरानले आधिकारिक रूपमा यो मार्ग पूर्ण रूपमा बन्द गरिएको पुष्टि नगरे पनि समुद्रमा रहेका जहाजहरूले बारम्बार यस्ता चेतावनीहरू प्राप्त गरिरहेको बताइएको छ । बेलायतको समुद्री व्यापार सञ्चालन निकायले पनि खाडी क्षेत्रमा रहेका धेरै जहाजहरूले स्ट्रेट अफ हर्मुज बन्द भएको जानकारी पाएको पुष्टि गरेको छ।

स्ट्रेट अफ हर्मुज विश्वको सबैभन्दा महत्वपूर्ण जलमार्गमध्ये एक हो, जहाँबाट विश्वको कुल तेल व्यापारको झन्डै २० प्रतिशत हिस्सा ओसारपसार हुने गर्दछ।

इरानले आफ्नो देशमाथि हुने कुनै पनि आक्रमणको बदला लिन यो मार्ग बन्द गरिदिने धम्की वर्षौंदेखि दिँदै आएको थियो। यो मार्गमा हुने अवरोधले विश्व बजारमा कच्चा तेलको मूल्य ह्वात्तै बढ्ने र विश्व अर्थतन्त्रमै गम्भीर प्रभाव पर्न सक्ने भन्दै अन्तर्राष्ट्रिय क्षेत्रमा चिन्ता व्यक्त गरिएको छ।