काठमाडौं- इरानका विदेशमन्त्री अब्बास अराघचीले ‘आफूलाई थाहा भएअनुसार’ सर्वोच्च नेता आयतोल्लाह अली खामेनी जीवितै रहेको जनाएका छन् ।

अमेरिकी टेलिभिजन एनबीसी न्यूजसँगको अन्तर्वार्तामा खामेनीको अवस्थाबारे सोधिएको प्रश्नमा उनले ‘आफूलाई थाहा भएअनुसार’ उनी जीवित र स्वस्थ रहेको स्पष्ट पारेका हुन् ।

अन्तर्वार्ताका क्रममा मन्त्री अराघचीले ‘इरानमा सत्ता परिवर्तन’ गर्ने अमेरिकी राष्ट्रपति डोनाल्ड ट्रम्पको भनाइलाई ‘मिसन इम्पोसिबल’ को संज्ञा दिएका छन् ।

हाल अमेरिकासँग कुनै पनि किसिमको सूचना आदान प्रदान नभइरहेको जानकारी दिँदै उनले वार्ता चाहेको भए अमेरिकाले आफूहरुलाई सम्पर्क गर्ने जिकिर गरे । यद्यपि, कुनै पनि वार्ताको सम्भावनाका लागि शुरुमा आक्रमणहरू रोकिनुपर्ने उनको सर्त छ ।

भर्खरैका घटनाक्रमहरूमा इरानका एक वा दुई कमाण्डरहरू मारिएको स्वीकार गर्दै उनले अन्य अधिकांश उच्च अधिकारीहरू भने सुरक्षित रहेको दाबी गरे ।

परमाणु कार्यक्रमका सम्बन्धमा चर्चा गर्दै अराघचीले इरानको शान्तिपूर्ण परमाणु कार्यक्रमको ग्यारेन्टी गर्ने सम्झौतामा पुग्न सकिने सम्भावना अझै बाँकी रहेको उल्लेख गरे । साथै, उनले इरानसँग अमेरिकासम्म प्रहार गर्न सक्ने क्षमताको क्षेप्यास्त्र नभएको र भविष्यमा पनि त्यस्तो हतियार बनाउने कुनै योजना नरहेको स्पष्ट पारेका छन् ।