काठमाडौं– अमेरिका र इजरायलले संयुक्त रुपमा गरेको हमलापछि इरानका सर्वोच्च नेताबारे कुनै जानकारी प्रप्त नभएको इजरायली सञ्चार माध्यमले दाबी गरेका छन् ।

जेरुसलेम पोस्टका अनुसार संयुक्त हमलापछि सर्वोच्च नेता आयातोल्लाह अली खामेनीको अवस्थाबारे कुनै विवरण सार्वजनिक गरिएको छैन ।

संयुक्त हमलाका क्रममा राजधानी तेहरानमा रहेको उनको आवासलाई निशाना बनाइएको थियो । इजरायली सुरक्षा अधिकारीले प्रारम्भीक मूल्यांकनका क्रममा खामेनी घाइते भएको हुनसक्ने आशङ्का गरेका छन् ।

यद्यपि यसबारे इजरायली, अमेरिकी वा इरानी स्रोतबाट कुनै आधिकारिक जानकारी प्राप्त नभएको जनाइएको छ ।

इजरायल र अमेरिकाले गरेको संयुक्त आक्रमणमा राजधानी तेहरानसहित कोम, इस्फहान, केर्मान्शा कराजजस्ता शहरलाई निशाना बनाइएको थियो । आक्रमणका क्रममा इरानका रक्षामन्त्री आमिर नशिरजादे र सैन्य संगठन इस्लामिक रिभल्युसनरी गार्ड कोरका कमाण्डर मोहम्मद पाकपोर मारिएको इजरायली सुरक्षा स्रोतलाई उद्धृत गर्दै जेरुसलेम पोस्टले उल्लेख गरेको छ ।

इरानी सुरक्षाकर्मीले खामेनी, राष्ट्रपति मसुद पेजेस्कियानको कार्यालय र संसद् भवन जाने बाटो बन्द गरेका छन् ।

यसअघि शनिबार सबेरै इरानी अधिकारीले समाचार संस्था रोयटर्ससँगको कुराकानीका क्रममा सर्वोच्च नेता खामेनी तेहरानमा नभएको र उनलाई सुरक्षित स्थानमा सारिएको जनाएका थिए ।

भू उपग्रहबाट प्राप्त तस्बिरमा खामेनी रहेको ठानिएको भवन परिसरमा सुरक्षाकर्मीको बाक्लो उपस्थिति देखिन्छ ।