काठमाडौं– जेन-जी आन्दोलनका क्रममा आगलागीबाट क्षतिग्रस्त बनेको रातो मछिन्द्रनाथको रथ का पाङ्ग्रा पुनर्निर्माण कार्य सुरु गरिएको छ। आन्दोलनका क्रममा लागेको आगोले दुईवटा पाङ्ग्रा पूर्ण रूपमा नष्ट भएपछि नयाँ पाङ्ग्रा निर्माण प्रक्रिया अघि बढाइएको हो।

परम्परागत रूपमा रथका पाङ्ग्रा प्रत्येक १२ वर्षमा बनाउने चलन रहे पनि आकस्मिक क्षति पुगेमा मात्रै पुनर्निर्माण गरिन्छ। यसपटक आन्दोलनका कारण पाङ्ग्रा जलेर काम नलाग्ने अवस्थामा पुगेपछि गुठी तथा सम्बन्धित निकायको समन्वयमा निर्माण थालिएको बताइएको छ।

स्थानीय गुठीका प्रतिनिधिका अनुसार सरस्वती पूजाको दिनदेखि पाङ्ग्रा बनाउने काम सुरु गरिएको हो। दक्ष कालिगढहरूको संलग्नतामा परम्परागत शैली र विधिअनुसार निर्माण भइरहेको छ। काठ छनोटदेखि जोडाइ र संरचना निर्माणसम्मका सबै प्रक्रिया धार्मिक परम्परा अनुसार गरिँदैछ।