राजविराज- जनता समाजवादी नेपालका नेता उमेश कुमार यादवले जस्तोसुकै सङ्घर्ष गरेर भए पनि रामराजासिंह स्वास्थ्य विज्ञान प्रतिष्ठान चलाएरै छाड्ने प्रतिवद्धता व्यक्त गरेका छन् ।

सप्तरी निर्वाचन क्षेत्र नम्बर २ बाट प्रतिनिधिसभा सदस्यका उम्मेदवार यादवले राजविराज–१० बिरौलमा बुधबार आयोजित चुनावी घरदैलोको उद्घाटन गर्दै उनले चुनाव जितेमा प्रतिष्ठान पहिलो प्राथमिकता हुने बताए ।

जसपा नेपालका अध्यक्ष उपेन्द्र यादवले अगाडि बढाएका योजनालाई पूर्णता दिने प्रतिवद्धता व्यक्त गर्दै उनले भने ‘काठमाडौंबाट मेरो लाश आउँछ वा प्रतिष्ठान सञ्चालनको शुभ समाचार आउनेछ ।’

विगतमा चुनाव जितेर सिँचाइ मन्त्री हुँदा सिँचाइ, नदी नियन्त्रण, शिक्षा, स्वास्थ्य र यातायातको क्षेत्रमा महत्पूर्ण काम गरेको चर्चा गर्दै उनले आगामी दिनमा थप सशक्त रुपमा जनताको सेवक भएर काम गर्ने प्रतिवद्धता व्यक्त गरे ।

जितपछि टोल–टोलमा जनपरिषद गठन गरि आफ्नो निर्वाचन क्षेत्र तथा जिल्लाको समग्र विकासमा सक्रिय भुमिका निर्वाह गर्ने उनले बताए ।

निर्वाचन क्षेत्रका प्रत्येक घरधुरीका प्रत्येक नागरिकहरुलाई सहभागिता हुने गरि जनपरिषद् गठन गर्ने, जनपरिषद्को नियमित बैठक बसाउने, जनपरिषदले स्थानीय मुद्दादेखि राष्ट्रिय एवम् अन्तर्राष्ट्रिय राजनीतिक, आर्थिक, पलायनता, बेरोजगारी, विभेद, पर्यावरण, कृषि लगायतका मुद्दामा छलफल गरेर निष्कर्षमा पुर्या‍उने उनले बाचा गरे ।

जनपरिषदले आफ्नो क्षेत्रका जनप्रतिनिधिलाई निगरानीमा राख्नुका साथै सुझाव ,सल्लाह र निर्देशन दिने जसपा नेपालका उम्मेदवार यादवले बताए ।