काठमाडौं– चुरेभावर लोकतान्त्रिक पार्टीले आफ्नो पार्टी नेपाली कम्युनिष्ट पार्टी (नेकपा) मा समाहित भएको भन्ने समाचार असत्य भएको स्पष्ट पारेको छ।

पार्टी अध्यक्ष भूमिराज निरौलाले मंगलबार सार्वजनिक भएका केही समाचारप्रति आपत्ति जनाउँदै चुरेभावर लोकतान्त्रिक पार्टी नेकपामा समाहित नभएको जिकिर गरेका छन्। उनले चुरेभावर नामबाट प्रकाशित समाचारले भ्रम सिर्जना गरेको भन्दै सच्याउन आग्रह गरे।

‘निर्वाचन आयोगमा दर्ता भएको चुरेभावर नामको पार्टी हाम्रोबाहेक अरु कुनै छैन,’ अध्यक्ष निरौलाले भने, ‘मंगलबार प्रकाशित समाचारको हामी खण्डन गर्दछौँ।’ उनले यसअघि नै कारबाही भइसकेका व्यक्तिहरू र चुरेभावर लोकतान्त्रिक पार्टीबीच कुनै सम्बन्ध नरहेको पनि स्पष्ट पारे।

अध्यक्ष निरौलाका अनुसार बद्री न्यौपानेको नेतृत्वमा रहेको चुरेभावर राष्ट्रिय पार्टी नेकपामा समाहित भएको भनेर आएको समाचारले भ्रम सिर्जना गरेको हो। नेकपाको पार्टी कार्यालय पेरिसडाँडामा आयोजित कार्यक्रममा न्यौपाने नेतृत्वको पार्टी समाहित भएको उल्लेख गरिएपछि चुरेभावर लोकतान्त्रिक पार्टीले आपत्ति जनाएको हो।

पार्टीले चुरेभावर लोकतान्त्रिक पार्टीको नाम र पहिचान प्रयोग गरेर फैलाइएका समाचारप्रति सचेत रहन सबैलाई आग्रह गरेको छ।