काठमाडौं– नेपाली कांग्रेसले आगामी फागुन २१ गते हुने प्रतिनिधि सभा सदस्य निर्वाचनका लागि रणनीति तयार गर्दैछ।

यसका लागि उपसभापति विश्वप्रकाश शर्माको संयोजकत्वमा बनेको चुनावी परिचालन समितिले निर्वाचन परिचालन निर्देशिका तयार गर्दैछ ।

कांग्रेसको विभिन्न तहको जिम्मेवारीमा रहेका पदाधिकारी र सदस्यहरू माघ २१ देखि फागुन २१ सम्म आआफ्नो जिम्मेवारीको क्षेत्रमा खट्ने छन् ।

‘चुनावको अन्तिम ३० दिन, जसको जिम्मेवारी जहाँ, उसले खट्ने त्यहाँ’ भन्ने नीति निर्देशिकामा समेटिने छ ।

उपसभापति शर्माले केन्द्रीय कार्यालयमा चलिरहेको प्रदेश स्तरीय विशेष आन्तरिक छलफल कार्यक्रममा उक्त कुरा बताएका हुन् ।

मंगलबारसम्ममा कर्णाली र सुदूर पश्चिमको छलफल सकिएको छ । आज (बुधबार) गण्डकी प्रदेशको छलफल हुँदैछ ।

छलफलमा सम्बन्धित प्रदेशबाट केन्द्रीय समितिमा प्रतिनिधित्व गर्ने वर्तमान र निवर्तमान केन्द्रीय पदाधिकारी र सदस्य, जिल्ला सम्पर्क समितिका सभापति एवं काठमाडौंमा रहेका विभिन्न पेशा व्यवसायमा संलग्न कांग्रेसका शुभेच्छुक एवं युवाहरू सहभागी रहेको उपसभापति शर्माको सचिवालयले जनाएको छ ।