एजेन्सी– आर्टिफिसियल इन्टेलिजेन्स (एआई) को तीव्र विस्तारका कारण प्रविधि उत्पादन क्षेत्रमा सुधार आए तापनि कमजोर आन्तरिक मागका कारण अगस्ट महिनामा चीनको औद्योगिक नाफा वृद्धि थप सुस्त भएको छ ।

 चीनको राष्ट्रिय तथ्याङ्क ब्युरो (एनबीएस) ले सार्वजनिक गरेको तथ्याङ्क अनुसार अगस्ट महिनामा चीनका औद्योगिक फर्महरूको नाफा अघिल्लो वर्षको सोही अवधिको तुलनामा ४.२ प्रतिशत ले बढेको छ, जुन जुलाई महिनामा ११.२ प्रतिशत रहेको थियो । 

यसैगरी, वर्षको पहिलो आठ महिना (जनवरीदेखि अगस्ट) मा औद्योगिक नाफा १५.७ प्रतिशतले बढेको छ, जुन जनवरीदेखि जुलाईको अवधिमा १७.६ प्रतिशत रहेको थियो ।

घरेलु खपतमा आएको सुस्तता र केही क्षेत्रमा रहेको अतिरिक्त उत्पादन क्षमताका कारण कम्पनीहरूले वस्तुको मूल्य निर्धारण गर्ने क्षमता कायम राख्न संघर्ष गरिरहेका छन्, जसका कारण कारखानाहरू नाफाका लागि वैदेशिक बजारमा बढी निर्भर हुनुपरेको छ । यसले भूराजनीतिक तनाव बढेको र व्यापार नाफामाथि कडा निगरानी भइरहेका बेला चीनको निर्यातमाथिको निर्भरता अझ बढाउने जोखिम सिर्जना गरेको छ । 

क्षेत्रगत आधारमा हेर्दा कम्प्युटर, सञ्चार तथा अन्य इलेक्ट्रोनिक उपकरण उत्पादन क्षेत्रको नाफा पहिलो आठ महिनामा ११० प्रतिशत ले बढेर अगाडि रहेको छ भने वाइन, पेय पदार्थ र प्रशोधित चिया उत्पादन क्षेत्रको नाफा ३४.७ प्रतिशतले घटेर सबैभन्दा कमजोर प्रदर्शन गर्नेमध्ये परेको छ ।
 
गत साता चिनियाँ राष्ट्रपति सि जिनपिङको वासिङ्टन भ्रमणका क्रममा चीन र अमेरिकाबिच ३० अर्ब अमेरिकी डलर बराबरका सामानमा भन्सार महसुल घटाउन र एआईका जोखिम तथा फाइदाबारे संवाद गर्न सहमति भएको भए तापनि दुई देशबिचको सम्बन्धमा भित्री तनावहरू कायम नै छन् । 

यसै महिनाको सुरुमा चीनको केन्द्रीय बैंकका एक सल्लाहकारले एआईको प्रयोगले बलियो आपूर्ति र कमजोर मागबिचको असन्तुलनलाई अझ बिगार्न सक्ने चेतावनी दिँदै उपभोक्ता खर्च बढाउनुपर्नेमा जोड दिएका थिए ।