काठमाडौँ : लिओनेल मेसीले गोल गरे पनि मेजर लिग सकर (एमएलएस) को खेलमा इन्टर मायमी कोलम्बस क्र्युसँग २–१ गोल अन्तरले पराजित भएको छ।

खेलको २८औँ मिनेटमा प्राप्त पेनाल्टीलाई सदुपयोग गर्दै जोसेफ मार्टिनेजले कोलम्बस क्र्युलाई सुरुआती अग्रता दिलाएका थिए। त्यसको पाँच मिनेटमै ३३औँ मिनेटमा इन्टर मायमीका कप्तान लिओनेल मेसीले गोल गर्दै खेललाई १–१ को बराबरीमा ल्याए।

निर्धारित ९० मिनेटसम्म १–१ को स्थितिमा रहेको खेलको इन्जुरी समयमा नाटकीय मोड आयो। ९० पछिको ६औँ मिनेटमा इन्टर मायमीका युवा खेलाडी सान्तियागो मोरालेसले रातो कार्ड (दोहोरो पहेँलो) खाँदै मैदान छाडेपछि मायमी १० खेलाडीमा समेटियो।

त्यसको फाइदा उठाउँदै ९० मिनेटपछि थपिएको ९औँ मिनेटमा कोलम्बसका जमाल थियारेले गोल गर्दै टोलीलाई २–१ को रोमाञ्चक जित दिलाए।