रसुवा – भोटेकोशी नदीमा आएको विनाशकारी बाढीका कारण माथिल्लो त्रिशूली–३ ‘ए’ जलविद्युत् आयोजनाको सुरुङमा फसेका नागरिकको उद्धारका लागि गृहमन्त्री सुधन गुरुङ आफैं घटनास्थलमा खटिएका छन् ।

बाढीका कारण आयोजनाको सुरुङ प्रवेशद्वारमा माटो तथा ढुंगामाटो थुप्रिएपछि सुरुङभित्र रहेका कर्मचारी तथा अन्य व्यक्ति बाहिर निस्कन नसकेको सूचना आएपछि उद्धार कार्य तीव्र पारिएको हो । प्रारम्भिक विवरणअनुसार हाइड्रो इन्जिनियरसहित करिब ३५ जना सुरुङभित्र फसेका छन् ।

सुरुङको प्रवेशद्वारमा थुप्रिएको माटो र ढुंगा हटाउन मिनी स्काभेटर आवश्यक परेको सूचना आएपछि आवश्यक उपकरणसहित उद्धार टोली घटनास्थलमा परिचालन गरिएको छ । गृहमन्त्री गुरुङको नेतृत्वमा नेपाली सेना र सशस्त्र प्रहरीका सुरक्षाकर्मी तथा प्राविधिक टोलीले सुरुङको अवरोध हटाएर फसेकाहरूलाई सुरक्षित बाहिर निकाल्ने प्रयास गरिरहेका छन् ।

सुरुङभित्र फसेकाहरूको अवस्था थप जोखिमपूर्ण बन्न नदिन रातको समयमा समेत उद्धार कार्य जारी राखिएको छ । सुरुङभित्र अक्सिजनको मात्रा घट्न सक्ने जोखिम रहेकाले उद्धारलाई उच्च प्राथमिकताका साथ अघि बढाइएको गृहमन्त्रीको सचिवालयले जनाएको छ ।

यसअघि बाढीका कारण माथिल्लो त्रिशूली क्षेत्रमा रहेका अन्य जलविद्युत् आयोजनाका सुरुङ तथा संरचनामा समेत मानिसहरू फसेका थिए। नेपाली सेनाले अर्को सुरुङबाट सयौं मानिसको उद्धार गरिसकेको जनाएको छ । अझै केही व्यक्ति फसेको हुनसक्ने भन्दै खोज तथा उद्धार जारी राखिएको छ ।

फसेकाहरूलाई सकुशल उद्धार गर्ने लक्ष्यसहित सुरक्षाकर्मी, प्राविधिक तथा उद्धार टोलीले जोखिमका बीच अभियानलाई तीव्रता दिएका छन् ।