काठमाडौं- ऊर्जा, जलस्रोत तथा सिँचाइमन्त्री विराजभक्त श्रेष्ठले भोटेकोशी नदीमा आएको बाढीका कारण ठूलो जनधनको क्षति भए पनि नेपाल विद्युत् प्राधिकरणका कर्मचारीको सक्रियताका कारण विद्युत् सेवा नियमित राख्न सफल भएको बताएका छन् ।

बाढीका कारण केही सहकर्मी सम्पर्कविहीन रहेको अवस्थामा समेत प्राधिकरणका कर्मचारीले निरन्तर काम गरेर विद्युत् सेवा सञ्चालनमा राखेको उनले जानकारी दिए । कुल विद्युत् उत्पादन क्षमताको करिब १० प्रतिशत विद्युत् प्रणालीबाट बाहिरिए पनि आपूर्ति व्यवस्थापनलाई सन्तुलित राख्न प्राधिकरण सफल भएको मन्त्री श्रेष्ठको भनाइ छ।

मन्त्री श्रेष्ठले बिहीबार साँझ स्युचाटारस्थित लोड डिस्प्याच सेन्टर (एलडीसी) पुगेर विद्युत् आपूर्ति व्यवस्थापनको अवस्थाबारे जानकारी लिएको थियो। सो क्रममा उजले बाढी प्रभावित नुवाकोटका अधिकांश क्षेत्रमा विद्युत् सेवा पुनःसञ्चालन भइसकेको तथा रसुवामा पनि सेवा पुनःस्थापनाको प्रयास भइरहेको जानकारी दिए।

‘अहिलेसम्म विद्युत् प्रणालीलाई सन्तुलित राख्न सफल भएका छौँ। ठूलो क्षतिका कारण आगामी दिनमा थप चुनौती आउन सक्ने भएकाले आवश्यक तयारी र व्यवस्थापनलाई उच्च प्राथमिकतामा राखिएको छ,’ मन्त्री श्रेष्ठले भने।

प्राधिकरणका अनुसार बुधबार साँझ विद्युत्को उच्चतम माग दुई हजार ९३९ मेगावाट रहेकामा बिहीबार साँझ दुई हजार ८९१ मेगावाटमा सीमित भएको थियो। काठमाडौँ उपत्यकाको विद्युत् माग पनि बुधबारको ५९० मेगावाटबाट घटेर बिहीबार ५७८ मेगावाट पुगेको थियो।

विद्युत् आयाततर्फ बुधबार ६२ मेगावाट विद्युत् आयात गरिएकोमा बिहीबार दुई मेगावाट मात्रै आयात गरिएको प्राधिकरणले जनाएको छ।

मन्त्री श्रेष्ठले बाढी प्रभावित क्षेत्रमा उद्धार तथा विद्युत् पुनःस्थापनाका लागि खटिएका प्राधिकरणका उच्च व्यवस्थापन, कर्मचारी तथा प्राविधिक टोलीलाई धन्यवाद दिए। उनले विपद्को कठिन परिस्थितिमा समेत विद्युत् सेवा नियमित राख्न कर्मचारीले देखाएको सक्रियता प्रशंसनीय रहेको बताए।

प्राधिकरणले वैकल्पिक स्रोतबाट नुवाकोटमा करिब सात मेगावाट विद्युत् आपूर्ति गरिरहेको छ। चपलीबाट दुई मेगावाट, इन्द्रावतीबाट एक मेगावाट, तादी जलविद्युत् केन्द्रबाट दुई मेगावाट तथा बालाजु–त्रिशूली प्रणालीबाट थप दुई मेगावाट विद्युत् नुवाकोटतर्फ पठाइएको प्राधिकरणले जनाएको छ।