विराटनगर- सुनसरीको देवानगञ्ज तनावपछि जिल्ला प्रशासन कार्यालय मोरङले जिल्लाभित्र डिजे बाजाको प्रयोगमा रोक लगाएको छ।

सहायक प्रमुख जिल्ला अधिकारी पवनराज कोइरालाले सोमबार सूचना जारी गर्दै मेला, महोत्सव, विवाहका विभिन्न समारोह, पार्टी, उत्सव, चाडपर्व, धार्मिक कार्यक्रम, पुराणलगायत कुनै पनि सार्वजनिक वा निजी कार्यक्रममा डिजे बजाउन तथा प्रयोग गर्न निषेध गरिएको जानकारी दिएका छन्।

प्रशासनले आदेशको उल्लंघन गर्दै डिजे प्रयोग गरेको वा गराएको पाइएमा प्रचलित कानुनबमोजिम कारबाही गरिने चेतावनी दिएको छ।

जिल्ला प्रशासन कार्यालयले जिल्लावासीलाई सूचनाको पूर्ण पालना गर्न आग्रह गर्दै अर्को सूचना जारी नभएसम्म प्रतिबन्ध कायम रहने जनाएको छ।