काठमाडौं- राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले पार्टीको कार्यशैली र सङ्गठनात्मक अवस्था अझै कमजोर रहे पनि जनतामाझ पार्टीका एजेन्डा स्थापित भइसकेको बताएका छन्।

शनिबार काठमाडौं जिल्ला समितिद्वारा आयोजित अगुवा कार्यकर्ता भेलालाई सम्बोधन गर्दै अध्यक्ष लिङ्देनले आफूले पार्टीको नेतृत्व सम्हालेयता राप्रपाको जनमत उल्लेखनीय रूपमा बढेको दाबी गरे।

उनले आगामी महाधिवेशनलाई पार्टी सुधार, सुदृढीकरण र पुनर्संरचनाको महत्वपूर्ण अवसरका रूपमा उपयोग गरिने बताए। नयाँ सोच, प्रभावकारी कार्यशैली र स्पष्ट योजनाका साथ पार्टीलाई थप सशक्त बनाइने उनको भनाइ थियो।

अध्यक्ष लिङ्देनले राप्रपाले उठाउँदै आएको राजसंस्था र हिन्दु राष्ट्रको मुद्दालाई निरन्तर अघि बढाइने स्पष्ट गर्दै ती एजेन्डाप्रति जनसमर्थन बढ्दै गएको दाबी गरे।

कार्यकर्तालाई सङ्गठन विस्तार, जनसम्पर्क वृद्धि र पार्टीका एजेन्डा प्रभावकारी रूपमा जनतामाझ पुर्‍याउन सक्रिय हुन उनले आग्रह गरे।