घोडाघोडी- सुदूरपश्चिम प्रदेशका मुख्यमन्त्री कमलबहादुर शाहले नागरिक र राज्यको सुरक्षा सुनिश्चित गर्न सरोकारवाला सबै निकायबीच प्रभावकारी समन्वय र सहकार्य अपरिहार्य रहेको बताएका छन्।

धनगढीमा शनिबार आयोजित ‘सुदूरपश्चिम प्रदेशस्तरीय अपराध अनुसन्धान समीक्षा गोष्ठी’ को उद्‌घाटन गर्दै मुख्यमन्त्री शाहले नागरिकको जीउधनको सुरक्षा र राज्यको सुरक्षा गर्ने दायित्व सरकार, सुरक्षा निकाय, न्यायपालिका तथा सञ्चार क्षेत्र सबैको साझा जिम्मेवारी भएको बताए।

उनले राज्यका सबै निकाय एकअर्काका परिपूरक भएकाले आपसी समन्वय र सहकार्यबाट मात्रै प्रभावकारी नतिजा हासिल गर्न सकिने उल्लेख गरे।

‘जनताको सुरक्षालाई केन्द्रमा राखेर काम गर्न सकिए राज्यप्रति नागरिकको विश्वास अझ मजबुत हुन्छ,’ उनले भने।

मुख्यमन्त्री शाहले अपराध अनुसन्धान प्रणालीलाई समयसापेक्ष, व्यावसायिक र नतिजामुखी बनाउन आवश्यक रहेकोमा जोड दिँदै अनुसन्धान प्रक्रियालाई थप प्रभावकारी बनाउने दिशामा सम्बन्धित निकायले समन्वित रूपमा काम गर्नुपर्ने बताए।