काठमाडौं- व्यवसायी तथा अभियन्ता दुर्गा प्रसाईं ले आफू २०८२ भदौ २३ र २४ गते भएको ‘जेन–जी’ आन्दोलनमा सहभागी नभएको दाबी गरेका छन्।

राष्ट्रिय मानव अधिकार आयोग प्रतिवेदन बुधबार सार्वजनिक भएपछि सामाजिक सञ्जालमा फैलिएका भ्रम चिर्न आफूले स्पष्ट धारणा सार्वजनिक गरेको प्रसाईंले बताएका छन्।

उनले आन्दोलनमा जान खोज्दा ‘जेन–जी’ समूहका केही व्यक्तिले आफूलाई ‘कालो झण्डा देखाउने’ भन्दै फोन गरेको उल्लेख गरेका छन्।

यसका साथै तत्कालीन काठमाडौं महानगरपालिकाका मेयर तथा हालका प्रधानमन्त्रीले फेसबुकमार्फत आफूलाई लक्षित गर्दै ‘बौलाहा अभियन्ता नआउनु’ भनेपछि आन्दोलनमा सहभागी नभएको उनको दाबी छ।

प्रसाईंले आन्दोलन सकिएपछि मात्रै देशको सुरक्षा संवेदनशीलता बुझेर सेना प्रमुखको आग्रहमा वार्ताका लागि गएको बताएका छन्।

आन्दोलनका क्रममा भएका तोडफोड र आपराधिक गतिविधिमा आफ्नो नाम जोड्नु नियोजित षड्यन्त्र भएको उनको भनाइ छ।

उनले ४२ नेपाली नागरिकको ज्यान जाने तथा ३ जना सुरक्षाकर्मीको हत्या हुने घटनामा संलग्न जोसुकैलाई कानुनी कारबाही गर्न माग गरेका छन्।

टीओबी ग्रुपलगायत दोषीलाई उन्मुक्ति दिन नहुने भन्दै उनले राष्ट्रिय मानव अधिकार आयोगको प्रतिवेदन अक्षरसः कार्यान्वयन हुनुपर्ने बताएका छन्। प्रसाईंले दण्डहीनताको अन्त्य गर्दै पीडितलाई न्याय दिनुपर्नेमा जोड दिएका छन्।