काठमाडौं– राष्ट्रिय स्वतन्त्र पार्टी (रास्वपा)की सांसद निशा डाँगीले सभामुख डोलप्रसाद अर्याल र प्रतिनिधि सभाका सांसदहरू बस्ने कुर्सीबारे प्रश्न उठाएकी छन् ।

उनले नेपालमै अर्बौँको काठ कुहिएर गइरहेका बेला संसद् भवनका फर्निचर पनि विदेशबाट आयात गरिएको काठबाट बनेको भन्दै प्रश्न उठाएृकी छन् ।

बुधबारको प्रतिनिधि सभा बैठकमा बोल्ने क्रममा उनले प्रश्न गरिन्, ‘दुई–तीन पछि हामी नयाँ संसद् जाँदैछौं । उक्त सदनमा सम्माननीय सभामुख र हामी सांसद बस्ने कुर्सी कुन देशबाट ल्याइएको काठबाट बनेको हो ?’

महालेखा परीक्षकको ६१ औं प्रतिवेदन उद्धृत गर्दै उनले नेपालको काठको सदुपयोग नहुँदा वार्षिक अर्बौं रुपैयाँको काष्ठजन्य सामग्री आयात भइरहेको जानकारी गराइन् ।

‘आज स्वदेशी काठ निकाल्न फाइल रोकिन्छ तर विदेशी काठ भित्राउन सजिलैसँग एलसी खुल्ने गर्छ, यो कस्तो किसिमको नीति हो ?’ उनले सोधिन् ।

डाँगीले सबै वन फँडानी गर्नुपर्छ भन्न नखोजेको बताउँदै नेपालमै भएको धनको सही सदुपयोग हुनुपर्नेमा जोड दिइन् ।