तेहरान–   मसूद पेजेश्कियानले मध्यपूर्वमा जारी तनाव र क्षेत्रीय चुनौतीहरूको सामना गर्न मुस्लिम राष्ट्रहरूबीच बलियो एकता आवश्यक रहेको बताएका छन्।

ईद अल–अधाको अवसर पारेर विभिन्न मुस्लिम देशका नेतासँग टेलिफोन संवाद गर्दै उनले इस्लामिक एकतालाई थप मजबुत बनाउन र साझा चुनौतीविरुद्ध सहकार्य विस्तार गर्नुपर्नेमा जोड दिएका हुन्।

इराक, ओमान, कतार, टर्की, ताजिकिस्तान, इजिप्ट, किर्गिजस्तान र अजरबैजानका नेतासँग शुभकामना आदानप्रदान गर्दै पेजेस्कियनले सामाजिक सञ्जाल एक्समार्फत मुस्लिम राष्ट्रहरूबीच आपसी सहयोग र समर्थन अझ सुदृढ हुनुपर्ने उल्लेख गरेका छन्।

किर्गिज राष्ट्रपति सदिर जापारोभसँगको संवादमा उनले ईद अल–अधालाई विश्वास, बलिदान र एकताको प्रतीकका रूपमा व्याख्या गर्दै यस पर्वले इस्लामिक राष्ट्रहरूबीच पारस्परिक विश्वास र क्षेत्रीय सम्बन्धलाई गहिरो बनाउने अवसर प्रदान गर्ने बताए।

इरानी सरकारी सञ्चारमाध्यम प्रेस टीभीका अनुसार पेजेस्कियनले क्षेत्रीय सम्बन्धमा ‘नयाँ अध्याय’ सुरु हुने विश्वास व्यक्त गर्दै बाह्य हस्तक्षेपको सामूहिक अस्वीकार र आपसी एकताको आवश्यकता औंल्याए । साथै, विवाद समाधानका लागि कूटनीतिक संवादप्रति इरान प्रतिबद्ध रहेको पनि उनले दोहोर्‍याए।

मलेसियाका प्रधानमन्त्री अनवर इब्राहिमसँगको वार्तामा पेजेस्कियनले मुस्लिम राष्ट्रहरूबीचको एकताले साझा क्षेत्रीय संकट समाधान गर्न र बाह्य दबाबको सामना गर्न महत्वपूर्ण भूमिका खेल्ने बताए। उनले तेहरान र क्वालालम्पुरबीच आर्थिक, सांस्कृतिक तथा सामाजिक सहकार्य विस्तार गर्न पनि आह्वान गरे।

जवाफमा प्रधानमन्त्री अनवर इब्राहिमले मुस्लिम राष्ट्रहरूबीच अझ व्यापक एकता र सहकार्यको अपेक्षा व्यक्त गरेका थिए।

त्यसैगरी, इराकका राष्ट्रपति निजार अल-अनी र प्रधानमन्त्री अली फलिह अल-जैदी सँगको छुट्टाछुट्टै संवादमा पेजेस्कियनले ईद अल–अधाले बलिदान, भाइचारा र ऐक्यबद्धताको सन्देश दिने उल्लेख गर्दै क्षेत्रीय सहकार्यलाई थप सुदृढ बनाउनुपर्ने आवश्यकता औंल्याए ।

विश्वभरका लाखौं मुस्लिम समुदायले हज यात्राको १०औँ दिनमा पैगम्बर इब्राहिमको ईश्वरप्रतिको समर्पणको स्मरण गर्दै ईद अल–अधा पर्व मनाउने गर्छन्।