काठमाडौं– नेकपा एमालेका सचिव महेश बस्नेतले आज माइतीघर मण्डलामा श्रीमती अम्बिकासहित केही महिलामाथि गालीगलौज र हातपात भएको भन्दै निष्पक्ष छानबिनको माग गरेका छन् ।

सामाजिक सञ्जालमा पोस्ट गर्दै सचिव बस्नेतले आफू र आफ्नो परिवारमाथि गरिएको साइबर अपराधविरुद्ध उजुरी दिन साइबर ब्यूरो जाने क्रममा माइतीघर मण्डलामा श्रीमती अम्बिकासहित केही महिलामाथि हातपात भएको दाबी गरेका छन् ।

उनले माइतीघर मण्डलामा केही व्यक्तिले आफ्नी श्रीमतीसहित केही महिलालाई गालीगलौज गर्नुका साथै हातपात समेत गरेको आरोप लगाएका छन् । माइतीघर मण्डलाको भिडभाड झ्यालबाट हेर्दै गर्दा केटा मान्छेसमेत त्यहाँ उपस्थित भीडले आफ्नी श्रीमतीसहितका महिलामाथि हातपात गरेको बस्नेतको जिकिर छ ।

घटनापछि उल्टै अम्बिकासहित आठ जनालाई प्रहरीले गिरफ्तार गरेको बस्नेतको भनाइ छ । बस्नेतले यस घटनालाई केही सञ्चार माध्यमहरूले गलत ढंगले प्रस्तुत गर्दै भ्रामक प्रचार गरिरहेको भन्दै दुःख र आपत्ति प्रकट गरेका छन् ।

माइतीघर मण्डलाजस्तो सार्वजनिक स्थललाई मन नपरेका व्यक्तिलाई बदनाम गर्ने र चरित्र हत्या गर्ने थलोका रूपमा प्रयोग गरिनु निन्दनीय रहेको उनको भनाइ छ ।

यस्तो संवेदनशील विषयमा सरकार मौन दर्शक बनेर बस्नु उपयुक्त नहुने भन्दै उनले पीडित आफैँले न्याय खोज्नुपर्ने अवस्था सिर्जना हुनु, उल्टै उनीहरूमाथि हातपात हुनु र गिरफ्तार गरिनु कुनै पनि लोकतान्त्रिक समाजका लागि राम्रो संकेत नभएको बताएका छन् ।

‘सम्बन्धित निकायले यस विषयमा गम्भीर ध्यान दिई निष्पक्ष छानबिन गरी दोषीमाथि कारबाही गर्नु आवश्यक छ । अन्यथा, सशक्त प्रतिरोध गरिनेछ ।’ उनले सामाजिक सञ्जालमा लेखेका छन् ।

यसअघि महेश बस्नेतमाथि बलात्कारको आरोप लगाउँदै आएकी शोभा पाठक र अम्बिकाबीच माइतीघर मण्डलामा हात हालाहाल भएको भिडियो सोमबार दिउँसो भाइरल भएको थियो । घटनापछि शोभा पाठकलाई उपचारका लागि ट्रमा सेन्टर लगिएको छ भने अम्बिका बस्नेतसहित केही महिलालाई प्रहरीले पक्राउ गरेको छ ।