काठमाडौं- बालेन्द्र शाहले स्वास्थ्यमन्त्रीमा निशा मेहतालाई अगाडि सार्न लागेका छन्।

बालेन्द्रको सचिवालयबाट प्राप्त जानकारीअनुसार मेहतालाई स्वास्थ्यमन्त्रीमा अगाडि बढाउने भएको हो।

यसअगाडि स्वास्थ्य मन्त्रीमा डाक्टर तोसिमा कार्कीको नाम आएको थियो। २०७९ पछि स्वास्थ्य राज्यमन्त्री बनेकी उनलाई योपटक बालेन्द्रले स्वास्थ्य मन्त्रालयको जिम्मेवारी दिने अनुमान थियो । तर उनको साटो मेहतालाई लान लागिएको हो ।

बालेनको सचिवालयका अनुसार अहिलेसम्मको अवस्थामा तोसिमाले स्वास्थ्य मन्त्रालय सम्हाल्ने अवसर न्यून छ। स्वास्थ्य मन्त्रालयका लागि अर्का डाक्टर लेखजन थापाले समेत दाबी गरेका थिए । तर उनलाई पनि बालेन्द्रले अगाडि सारेनन् ।

सुनसरी इनरूवाकी निशा पेशाले नर्स हुन् । स्वास्थ्य क्षेत्रमा उनी निरन्तर सक्रिय छिन् राष्ट्रिय स्वतन्त्र पार्टीमा उनी स्थापनाकालदेखि साधारण सदस्य थिइन्।

२०७९ को निर्वाचनमै रास्वपाले निशालाई समानुपातिकमा समेटेको थियो तर उनी सांसद बन्न पाइनन्। यसपटक सांसद बनेकी उनी मन्त्री हुन लागेकी छन् ।

भारतको ग्वालियारस्थित विश्वविद्यालयबाट नर्सिङमा स्नातकोत्तर गरेपछि उनले विराटनगरस्थित विराट टिचिङ हस्पिटलमा काम गर्दै आएकी थिइन् ।