काठमाडौं- नेपाली कांग्रेसका सभापति गगनकुमार थापाले भड्किला र उत्तेजक भाषणले मात्रै देश नबन्ने बताएका छन् ।

बुटवलमा शुक्रबार आयोजित चुनावी सभालाई सम्बोधनका क्रममा उनले यस्तो बताएका हुन् ।

राष्ट्रिय स्वतन्त्र पार्टीका वरिष्ठ नेता बालेन्द्र साहले सडकसहित विकास निर्माणका कामको जिम्मा लिएर अघि नबढाउनेलाई रुखमा बाँध्ने भनेर दिएको भनाइको जवाफ दिँदै उनले देश त्यसरी नबन्ने बताए ।

‘यहाँको एयरपोर्टमा जहाज ल्यान्ड गरेन भनेर पाइलटलाई कोर्रा हानेर हुँदैन। त्यसको समस्या हामीले पहिचान गर्नुपर्छ’, उनले भने, ‘सडक किन ढिला बनिनरहेका छन् ? कानुनमा समस्या छ, त्यसैले मैले ४१ वटा कानुन फेर्नुपर्छ भनेको छु। कुनै साथीले भनेजस्तो सडक बनेन भनेर कसैलाई रुखमा झुन्ड्याउँछु भन्दैमा देश बन्दैन ।’

थापाले आगामी पाँच वर्षका लागि देशको नेतृत्व लिन कांग्रेसका सबै नेता-कार्यकर्ता घर घर जानुपर्ने बताए । ‘पार्टीका साथीहरू घर घर गइदिनुपर्छ। मैले सर्लाही ४ मै मिहिनेत गर्नुपर्छ । तपाईंहरू हरेक जना आफैं उम्मेदवार बनेर मतदातामाझ जानुपर्छ’, उनले भने, ‘२०८२ सालमा कांग्रेसको रुख चिह्नमा मत हाल्नु नपर्ने एउटा कारण छैन । देशलाई सुधार गरेर सम्हाल्दै लैजाने तागत कांग्रेसमा छ। अबको पाँच वर्षको समय खेर नफ्याँकौँ ।’

उनले सामाजिक सञ्जालमा लेखेर मात्रै मत नआउने पनि बताए । ‘पार्टीका साथीहरू मतदाताका घर घर जानुस् । सामाजिक सञ्जालमा लेखेर मात्रै नबस्नुस् ।
तपाईंको गोडा चलाउनुस्, हात चलाउनुस्, मुख चलाउनुस्, मतदातालाई ढोग्नुस्’, उनले भने, ‘हिजोका तमाम खराब कुरा छाड्छु, राम्रो कुरा बोक्छु भनेर हामी जानुपर्छ। त्यसकै लागि हामीले कांग्रेसको नेतृत्व फेरेका हौँ ।’