काठमाडौं– काठमाडौं महानगरपालिकाले बागबजार क्षेत्रमा तीन दिनअघि टुकुचा खोला खुलाउने काम सुरु गरे पनि त्यसयता कुनै उल्लेखनीय प्रगति भएको छैन ।

खोला खोज्ने भन्दै सडक भत्काइएपछि बागबजार–पुतलीसडक खण्ड अस्तव्यस्त बनेको छ । व्यस्त समयमा सवारी चाप अत्यधिक हुने उक्त क्षेत्रमा सडक नै भत्काइँदा ट्राफिक व्यवस्थापनमा समस्या देखिएको हो ।

पुतलीसडक आसपास सवारी साधन लामो समय जाममा बस्न बाध्य भएका छन् । पैदलयात्रु समेत धुलो र अव्यवस्थित सडकका कारण सास्ती खेपिरहेका छन् ।

स्थानीय व्यवसायीले काम अघि नबढाई सडक भत्काएर छाड्दा व्यापार प्रभावित भएको गुनासो गरेका छन् । उनीहरूले काम तीव्र पारेर छिटो व्यवस्थापन गर्न सम्बन्धित निकायसँग माग गरेका छन् ।