काठमाडौँ – पूर्वप्रधानमन्त्री डा. बाबुराम भट्टराईले निर्वाचित सरकारलाई संविधानको परिधिभित्र रहेर पूरा कार्यकाल काम गर्न दिनुपर्ने बताएका छन् ।  

सामाजिक सञ्जाल फेसबुकमार्फत आफ्नो धारणा सार्वजनिक गर्दै भट्टराईले प्रमुख राष्ट्रिय चाडपर्व सकिएलगत्तै देशमा आन्दोलन र सरकार परिवर्तनको चर्चा सुरु हुनु विडम्बनापूर्ण र चिन्ताजनक रहेको बताएका हुन् ।

उनले निर्वाचन सम्पन्न भएको केही दिनदेखि नै सरकार फेर्ने वा ढाल्ने चर्चा गर्नु देशलाई अनिश्चिततातर्फ धकेल्ने काम भएको टिप्पणी गरेका छन् ।

‘निर्वाचित सरकारलाई संविधानको परिधिभित्र रहेसम्म आफ्नो पूरा अवधि काम गर्न दिऊँ ! काम नगरे वा विगारे अर्को चुनावबाट बिदा गरौं !’ भट्टराईले लेखेका छन् ।

उनले विगतमा पटकपटक सरकार परिवर्तन हुँदा त्यसका दुष्परिणाम देखिसकिएको उल्लेख गर्दै पुनः त्यही प्रवृत्ति दोहोर्‍याउनु देशको अर्थतन्त्र, राजनीतिक स्थिरता र राष्ट्रिय हितका लागि घातक हुने बताएका छन् ।

भट्टराईले सरकार परिवर्तनको निरन्तर चर्चाले देशलाई अनिश्चितताको भुमरीमा फसाउने, अर्थतन्त्र कमजोर बनाउने, युवालाई विदेश पलायन हुन बाध्य पार्ने र देशलाई भूराजनीतिक जोखिममा पार्ने चेतावनी दिएका छन् ।

उनले बहुदलीय लोकतन्त्रमा सत्तापक्ष र प्रतिपक्षबीच प्रतिस्पर्धा, सहकार्य तथा सदन र सडकमा आलोचना–प्रत्यालोचना हुनु स्वाभाविक र आवश्यक रहेको बताएका छन् ।

सरकार र राज्यका विभिन्न निकायलाई निरन्तर खबरदारी गर्नुपर्नेमा जोड दिँदै भट्टराईले विपत्तिमा परेका, ऐतिहासिक रूपमा वञ्चितीकरणमा परेका तथा गरिब र निमुखा जनताको आवाज सत्तामा रहेकाहरूले सुनिरहेको सुनिश्चित गर्नुपर्ने बताएका छन् ।

सत्तामा रहेकाहरूले जनताको आवाज नसुने विधिसम्मत ढंगले दण्डित गर्ने वा पदबाट हटाउने प्रक्रिया अपनाउनुपर्ने उनको भनाइ छ ।