काठमाडौं – मनाङको चामेमा पहिरो खसेपछि मर्स्याङ्दी नदीको बहाव प्रभावित भएको छ ।

जिल्ला प्रशासन कार्यालय मनाङका अनुसार आइतबार साँझ करिब ७ बजे चामेस्थित मर्स्याङ्दी नदीमा पहिरो खसेर नदीको बहाव कम भएको हो ।

पहिरो खस्ने क्रम अझै नरोकिएको प्रशासनले जनाएको छ । साँझ पौने ८ बजेसम्म पनि नदी आसपास पहिरो खसिरहेको सूचना प्राप्त भएको जिल्ला प्रशासन कार्यालयले जनाएको छ ।

पहिरोका कारण नदी थुनिँदै गएपछि तटीय क्षेत्रमा जोखिम बढेकाे भन्दै प्रशासनले मर्स्याङ्दी नदीको तटीय तथा करिडोर आसपासका बासिन्दालाई उच्च सतर्कता अपनाउन आग्रह गरेको छ ।

प्रशासनले नदीको बहावमा थप परिवर्तन आउन सक्ने भएकाले नदी आसपास अनावश्यक रूपमा नजान तथा सम्भावित जोखिमबाट जोगिन आग्रह गरेको छ ।