काठमाडौं– राष्ट्रिय प्रकृति संरक्षण कोष, अन्नपूर्ण संरक्षण क्षेत्र आयोजनाले भारी वर्षाको सम्भावनालाई मध्यनजर गर्दै पर्यटक तथा सम्बन्धित सबै सरोकारवालाहरूका लागि अत्यन्त जरुरी सूचना जारी गरेको छ ।

जल तथा मौसम पूर्वानुमान अनुसार २०८३ साल असोज ८ गतेदेखि १२ गतेसम्म देशका विभिन्न भागमा भारी वर्षाको सम्भावना कायम रहेको छ । 

यसै परिस्थिति र प्राप्त निर्देशनलाई ध्यानमा राख्दै अन्नपूर्ण, मनास्लु तथा गौरीशङ्कर संरक्षण क्षेत्रका लागि प्रवेश अनुमति पत्रहरू असोज ११ गते दिउँसो १२ बजेदेखि मात्र जारी गरिने व्यवस्था गरिएको छ ।

प्रवेश अनुमति पत्र प्राप्त भए तापनि असोज १२ गतेको बिहानदेखि बाटोको अवस्था र मौसमको मूल्याङ्कन गरेर मात्र पर्यटकहरूलाई संरक्षण क्षेत्रमा प्रवेश दिइनेछ । 

मनसुनका कारण पदमार्गको अवस्था परिवर्तन हुन सक्ने भएकाले जोमसोम, मुक्तिनाथ, घान्द्रुक तथा अन्य छोटो दूरीका गन्तव्य बाहेक अन्य ट्रेकिङ क्षेत्रमा जाने पर्यटकहरूले अनिवार्य रूपमा इजाजत प्राप्त ट्रेकिङ गाइड साथमा लैजानुपर्ने व्यवस्था गरिएको छ । 

पर्यटकहरूको सुरक्षालाई उच्च प्राथमिकतामा राख्दै यात्रा तय गर्नुअघि मौसम र पदमार्गको अवस्था अनिवार्य रूपमा बुझ्न आयोजनाले अनुरोध गरेको छ ।