काठमाडौं– सुरक्षा थ्रेट भन्दै शनिबार राति २ बजे अपराध अनुसन्धान कार्यालय, टेकु लगिएका पूर्वप्रधानन्यायाधीश चोलेन्द्र शमशेर जबरालाई प्रहरीले कडा सुरक्षासहित महाराजगन्जस्थित निजी निवास पुर्‍याएको छ ।

अपराध अनुन्धान कार्यालयका एसएसपी सन्तोष खड्का आफैंले जबरालाई महाराजगन्जस्थित घरसम्म पुर्‍याएका हुन् । अब जबरालाई घरमै थप सुरक्षासहित राखिने भएको छ ।

अपराध अनुसन्धान कार्यालय, टेकुका प्रमुख एसएसपी खड्काले जबरालाई उनले भनेकै स्थानमा पठाइएको बताए । ‘उहाँले भनेकै स्थानमा यहाँबाट पठाइयो,’ खड्काले भने ।

जबरालाई कहाँ पठाइएको हो भन्ने प्रश्नमा उनले सुरक्षाका कारण स्थान खुलाउन नमिल्ने बताएका थि ए। पछि उनलाई महाराजगन्जस्थित निजी निवासमै पुर्‍याइएको हो ।

जबराको सुरक्षाका लागि उनको निवासमा सुरक्षाकर्मी तैनाथ गरिँदैछ । अब उनलाई घरमै निगरानीसहित राखिने प्रहरीले जनाएको छ । अपराध अनुसन्धान कार्यालयका एसपी रामेश्वर कार्कीले जबरालाई परिवारको जिम्मा लगाइएको बताएका छन् ।

यसअघि जबरालाई भेट्न राष्ट्रिय मानव अधिकार आयोगको टोली टेकु पुगेको थियो । आयोग सदस्य मनोज दुवाडीसहित तीन सदस्यीय टोली करिब ४५ मिनेट गेटमै कुर्दा पनि प्रवेश नपाएपछि जबरालाई नभेटी फर्किएको थियो ।

तस्बिरहरु- नेपाल फोटो लाइब्रेरी