काठमाडौँ – जल तथा मौसम विज्ञान विभागअन्तर्गतको बाढी पूर्वानुमान महाशाखाका अनुसार आइतबार देशभरका नदी तथा खोलामा पानीको बहाव उच्च रहने जनाउँदै उच्च सतर्कता अपनाउन आग्रह गरेको छ।

महाशाखाका अनुसार काठमाडौँ उपत्यकाका तीनै जिल्लासहित उपत्यकाबाहिरका उपत्यका, मधेस र पहाडी भेगका ३४ भन्दा बढी जिल्ला भएर बहने साना नदीहरूमा आकस्मिक बाढी (फ्ल्यास फ्लड) को मध्यम जोखिम रहेको छ।

यस्तै, गण्डकी र लुम्बिनी प्रदेशका धेरैजसो जिल्ला तथा बागमतीका केही जिल्लासहित १७ जिल्ला भएर बहने साना नदीहरूमा आकस्मिक बाढीको उच्च जोखिम रहेको छ। गण्डकीका लमजुङ, कास्की, मनाङ, मुस्ताङ, म्याग्दी, बागलुङ, पर्वत, तनहुँ, स्याङ्जा तथा लुम्बिनीका रूपन्देही, कपिलवस्तु, नवलपरासी (पूर्व र पश्चिम), पाल्पा, गुल्मी र चितवन जिल्लाका साना नदीमा बाढीको जोखिम उच्च रहने भएकाले विशेष सजगता अपनाउन महाशाखाले अनुरोध गरेको छ।

यसैगरी, कोशी, नारायणी र तिनका सहायक नदीहरूमा जलसतह सतर्कता तह माथि पुगेको छ। महाशाखाले नारायणी नदीका बुढीगण्डकी, मर्स्याङ्दी, सेती, माडी, बडिगाड र कालीगण्डकीमा पानीको बहाव उल्लेख्य बढ्ने पूर्वानुमान गरेको छ।