काठमाडौं- भारतका विदेशमन्त्री एस जयशंकरले नेपालमा आएको विनाशकारी बाढीपहिरोबारे उच्चस्तरीय समीक्षा बैठक गरेका छन्।

जयशंकरले विदेश सचिव, विदेश मन्त्रालयको टोली तथा काठमाडौं र चीनको राजधानी बेइजिङस्थित भारतीय राजदूतहरूसँग बाढीपहिरोको अवस्थाबारे समीक्षा गरेका हुन्।

उनले बाढी प्रभावित क्षेत्रमा रहेका भारतीय नागरिकको अवस्था र सुरक्षाबारे जानकारी लिन तत्काल प्रयास भइरहेको बताएका छन्।

जयशंकरका अनुसार भारतीय विदेश मन्त्रालयले यस विषयमा विभिन्न मन्त्रालय, राज्य सरकार, टुर अपरेटर तथा विभिन्न परियोजनाका अधिकारीहरूसँग समन्वय गरिरहेको छ।

भारतले राहत तथा उद्धार प्रयासमा नेपाली पक्षसँग पनि निकट रहेर काम गरिरहेको उनले बताएका छन्।

नेपालको रसुवा लगायतका सीमावर्ती क्षेत्रमा आएको विनाशकारी बाढीपहिरोका कारण ठूलो जनधनको क्षति भएको छ भने धेरै मानिस बेपत्ता छन्। प्रभावित क्षेत्रमा उद्धार तथा खोजी कार्य जारी छ।