काठमाडौं – रसुवास्थित भोटेकोशीमा आएको विनाशकारी बाढीले नागरिकमा असहज परिस्थिति निर्माण गरेपछि सेलिब्रिटीहरूले मनोरञ्जनका कार्यक्रम स्थगित गरेका छन् ।

गाइजात्राको अवसर पारेर सेलिब्रिटीहरूको दुई समूहले भदौ १२ गतेबाट छुट्टा छुट्टै गर्ने तयारी रहेको हाँस्य व्यङ्ग्य प्रहसन कार्यक्रम स्थागित गरिएको छ ।

सांस्कृति संस्थाले बिहीबार विज्ञप्ति जारी गरी गाइजात्रा अन्तर्गत हुने कार्यक्रम स्थगित भएको जानकारी दिएको छ । यो कार्यक्रम भदौ १२ देखि १५ गतेसम्म जारी रहने बताइएको थियो ।

हाँस्य कलाकार मनोज गजुरेलको समूहले कमलादीस्थित प्रज्ञा भवनमा गर्ने भनेको ‘२०८३ को गाइजात्रा’ पनि स्थगित गरिएको छ ।

यी दुई गाइजात्राका कार्यक्रमा डेढ दर्जनभन्दा बढी कलाकार प्रहसनमा सहभागी हुने तय भएको थियो ।

त्यस्तै, हाँस्य टेलिभिजन रियालिटी शो ‘कमेडी च्याम्पियन’को बिहीबार आयोजित पत्रकार सम्मेलन पनि स्थगित गरिएको छ ।

त्यस्तै, गायिका रचना रिमालले बाढी पीडितलाई प्रधानमन्त्री राहत कोषमार्फत् एक लाख सहयोग गर्दै आफ्ना सांगीतिक कार्यक्रम हाललाई रोकेकी छन् । उनी हाल सांगीतिक प्रस्तुतीका लागि अस्ट्रेलियामा छन् । शुक्रबार उनले सिड्नीमा सांगीतिक प्रस्तुती दिने तय भएको थियो ।

देश नै असहज परिस्थितिमा रहेकाले मनोरञ्जनात्मक गतिविधि हाललाई रोकिएको उनले जानकारी दिएकी छन् । अर्को सूचना सार्वजनिक गरेर कार्यक्रमबारे जानकारी दिने उनले बताएकी छन् ।

त्यस्तै, गायक प्रकाश दूतराजको पनि सांगीतिक प्रस्तुती दिने कार्यक्रम रोकिएको छ ।