काठमाडौँ – रसुवाको भोटेकोशी र त्रिशूली नदीमा आएको विनाशकारी आकस्मिक बाढीमा परी कम्तीमा चार जना रुसी नागरिक सम्पर्कविहीन भएका छन्। नेपालस्थित रसियाली दूतावासका अनुसार बाढी प्रभावित क्षेत्रमा रहेका आफ्ना चार नागरिकसँग सञ्चार सम्पर्क विच्छेद भएको छ।

दूतावासले दिएको जानकारीअनुसार रुसी नागरिकको अर्को आठ जनाको समूह भने रसुवाको सदरमुकाम धुन्चेमा सुरक्षित रहेको र उनीहरूलाई थप सुरक्षित स्थानतर्फ स्थानान्तरण गरिएको छ।

बाढी प्रभावित क्षेत्रमा अहिले नेपाली सुरक्षा निकाय तथा उद्धार टोलीहरूले बेपत्ता व्यक्तिको खोजी र उद्धार कार्यलाई तीव्रता दिएका छन्। तर, लगातारको प्रतिकूल मौसम र सञ्चार सेवा अवरुद्ध भएका कारण खोजी तथा उद्धारमा कठिनाइ भइरहेको दूतावासले जनाएको छ।

सम्पर्कविहीन भएका आफ्ना नागरिकहरूको अवस्थाबारे थप जानकारी लिन र उद्धार प्रक्रियालाई सहज बनाउन रसियाली दूतावासले नेपाल सरकारका सम्बन्धित निकायहरूसँग निरन्तर समन्वय गरिरहेको जनाएको छ।