काठमाडौं– भारत सरकारको आर्थिक सहयोगमा दार्चुलाको शैल्यशिखर नगरपालिका–९ स्थित श्री गोकुलेश्वर माध्यमिक विद्यालयको नयाँ भवन निर्माण सुरु भएको छ।

सोमबार आयोजित कार्यक्रममा काठमाडौंस्थित भारतीय राजदूतावासका प्रथम सचिव बशिष्ट नन्दन र शैल्यशिखर नगरपालिकाका मेयर विजय सिंह धामीले संयुक्त रूपमा भवनको शिलान्यास गरेका हुन्।

भारतीय राजदूतावासका अनुसार करिब ७.५ करोड रुपैयाँ लागतमा निर्माण हुने उक्त विद्यालय भवन उच्च प्रभाव सामुदायिक विकास परियोजना (एचआईसीडीपी) अन्तर्गत निर्माण हुन लागेको हो। परियोजना शैल्यशिखर नगरपालिकामार्फत कार्यान्वयन गरिनेछ।

यो दार्चुलामा भारत सरकारको सहयोगमा सञ्चालन भइरहेको ११औँ उच्च प्रभाव सामुदायिक विकास परियोजना हो।

शिलान्यास कार्यक्रममा शैल्यशिखर नगरपालिकाका मेयरसहित अन्य सरोकारवालाले भारत सरकारको विकास सहयोगप्रति आभार व्यक्त गर्दै नयाँ विद्यालय भवनले विद्यार्थी र शिक्षकका लागि गुणस्तरीय सिकाइ वातावरण सिर्जना गर्न महत्वपूर्ण योगदान पुग्ने विश्वास व्यक्त गरेका छन्।

भारतीय राजदूतावासले नेपाल र भारतबीच निकट छिमेकीका रूपमा व्यापक तथा बहुआयामिक सहकार्य रहँदै आएको उल्लेख गरेको छ।

यसका साथै, उच्च प्रभाव सामुदायिक विकास परियोजनामार्फत प्राथमिकताका क्षेत्रको पूर्वाधार विकासमा सहयोग गर्दै नेपाल सरकारको विकास र समृद्धिको प्रयासलाई भारत सरकारले निरन्तर साथ दिँदै आएको पनि विज्ञप्तिमा उल्लेख छ।