सुनसरी– सुनसरीको देवानगञ्ज गाउँपालिका-३ स्थित कप्तानगञ्ज (नयाँ हटिया क्षेत्र) मा दुई समुदायबीच हिंसात्मक झडपपछि अवस्था तनावपूर्ण बन्दै जाँदा दुवै सुरक्षा निकायका प्रमुख जिल्लामा अनुपस्थित रहेको खुलेको छ । 

जिल्ला प्रहरी कार्यालयका प्रमुख एवम् एसपी केशवकुमार थेबे चार दिनदेखि बिदामा रहेको खुलेको छ । उनी बुवा बिरामी भएपछि उपचार गराउन बिदा लिएर जिल्लाबाहिर गएका थिए । 

उता नेपाल प्रहरीका कोशी प्रदेश प्रमुख डीआईजी विनोद घिमिरे पनि बिदामा रहेका पाइएको छ । 

अर्कोतिर सशस्त्र प्रहरीका एसपीलाई गृहमन्त्री सुधन गुरूङकै निर्देशनमा असार अन्तिम साता हलचोकले हेडक्वाटर तानिएको थियो । गृहमन्त्री सुधन गुरुङ गत असार अन्तिम साता पूर्वी नेपाल पुगेका थिए ।

त्यसबेला तस्करी नियन्त्रणमा असफल भएको भन्दै उनले हलचोकलाई निर्देशन दिएर झपा र सुनसरीका सशस्त्रका एसपीलाई हेडक्वाटर तान्न निर्देशन दिए। बेनामे उजुरीका आधारमा उनलाई हेडक्वाटर तानिएको थियो ।

गत असार ३० मा सुनसरीस्थित सशस्त्र प्रहरी बल नेपाल नम्बर ४ गण इनरूवाका एसपी श्याम कार्कीलाई हेडक्वार तानिएपछि निमित्तको भरमा चलेको थियो । 

तर उनको ठाउँमा सुधनले आजसम्म अर्को एसपी पठाएका थिएनन् । छानबिनका नाममा सुरक्षाका हिसाबले सबैभन्दा संवेदनशील सुनसरीमा कमान्डर नै झण्डै एक महिनादेखि खाली राखियो ।

गत असार ३० मा सुधनले झापाबाट अम्बिका प्रसादलाई जोशी तानिएको थियो ।  तर ती दुवै ठाउँमा नयाँ सरूवा हुनुपर्ने थियो । 

तानेपछि अर्को मान्छे पठाउनु पर्ने हुन्छ। यदि कारबाही नगर्ने हो भने तानिएकालाई त्यही पठाउनु पर्थ्यो। तर त्यो कदम सही समयमा हुन सकेन ।

त्यसबेला सशस्त्र प्रहरी बलका २ डीएसपीसहित ८ जना सुरक्षाकर्मीलाई तस्करीमा संलग्नताको आरोपमा छानबिनका लागि हेडक्वाटर हल्चोक तानिएको थियो ।

बयानका क्रममा तल्लो तहका सुरक्षाकर्मीले तस्करीका लागि रकम उठाएर उपल्ला अधिकारीहरूलाई बुझाउने गरेको खुलाएपछि उनीहरूलाई तानिएको थियो ।