काठमाडौँ – नेकपा एमालेका नेता गोकुल बास्कोटाले प्रदेश सरकारमा आफ्नो पार्टी र नेपाल कम्युनिस्ट पार्टी (नेकपा) बीच नयाँ सत्ता समीकरण बनेकोप्रति कडा असन्तुष्टि जनाउँदै शीर्ष नेतृत्वमाथि कटाक्ष गरेका छन्।

सोमबार सामाजिक सञ्जाल फेसबुकमार्फत टिप्पणी गर्दै पूर्वमन्त्रीसमेत रहेका नेता बास्कोटाले एमाले अध्यक्ष केपी शर्मा ओली र नेकपाका संयोजक पुष्पकमल दाहाल ‘प्रचण्ड’ को पछिल्लो राजनीतिक कदमप्रति आपत्ति जनाएका हुन्।

प्रदेशमा सत्ता समीकरण बदल्ने क्रममा एमाले र माओवादी (नेकपा) ले नेपाली कांग्रेसका सभापति शेरबहादुर देउवालाई पनि माथ खुवाएको टिप्पणी उनले गरेका छन्। निर्णय प्रक्रिया अपारदर्शी भएको भन्दै उनले शीर्ष नेताहरूको शैलीमाथि प्रश्न उठाएका हुन्।

“सत्ता समीकरणमा एमाले र माओवादीले देउवालाई पनि जित्ने हैसियत बनाए,” बास्कोटाले फेसबुकमा लेखेका छन्, “खोपी सत्ता किन बन्छन् र भत्कन्छन्? ती सभाका केही सदस्य र खास नेताबाहेक अरूले सुइँको समेत नपाउने कुरा परम्परा नै बन्यो।”

समीकरण फेरबदलको हतारोलाई लिएर व्यङ्ग्य गर्दै उनले लेखेका छन्, “हाँडी बोकेर स्वर्ग कि नर्क, हावा झैँ हुत्तिएका छन्। विजय मल्लको ‘अन्तिम भोज’ नै त यो होइन होला? अचम्म लाग्छ।”

प्रदेश तहमा सरकार निर्माण र हेरफेरका विषयमा पार्टीभित्र व्यापक छलफल र पारदर्शिता नभई सीमित नेताहरूबाट मात्रै निर्णय हुने गरेको भन्दै एमालेभित्रैबाट विरोधका स्वरहरू उठ्न थालेका छन्।