काठमाडौं- राष्ट्रिय स्वतन्त्र पार्टीको पदाधिकारीका लागि भएको निर्वाचनमा महामन्त्रीतर्फ मनिष झा पराजित भएका छन् । उनलाई सभापति रवि लामिछानेका विश्वासपात्र विपिन आचार्यले हराएका छन् ।

विपिनसँग पराजित भएपछि मनिषले आफ्नो राजनीतिक यात्रा जारी रहेको बताएका छन् । उनले निर्वाचनलाई लोकतान्त्रिक प्रक्रियाका रुपमा लिएको पनि बताए ।

‘मेरो लागि निर्वाचन लोकतान्त्रिक प्रक्रिया हो। रास्वपामा गुट र टीके राजनीतिक अभ्यास नहोस् भनेर गरिएको एक प्रयास थियो’, उनले भने, ‘नेतृत्वले स्वीकार गरेर निर्वाचन प्रक्रियालाई अगाडि बढाइदिनुभयो, आभारी छु। महाधिवेशनमा पदाधिकारी चयनको लागि भएको निर्वाचनमा म पराजित भएको छु, यो परिणाम स्वीकार गर्छु।’

उनले महामन्त्रीमा निर्वाचित विपिनलाई बधाई दिएका छन् । ‘मेरो मित्र विपिनलाई बधाई छ, मेरो अनुभव र क्षमताले सकेसम्म सहयोग गर्ने छु। म आज देखि केवल केन्द्रीय सदस्य र सांसदको रूपमा सक्रिय रहने छु’, उनले भनेका छन्।