काठमाडौं–  नेकपा एमालेकी नेता डा. विन्दा पाण्डेले नयाँ सरकारले यात्रामा महिलाको सुरक्षाको लागि भनेर छुट्टै ‘निलो बस’ को व्यवस्था गर्नु भनेको पुरानै लयमा फर्किन लागेको बताएकी छन् । महिला सुरक्षाको लागि आधुनिक अवधारणा ल्याउनुपर्नेमा नयाँहरूले झनै पुरानो शैली अपनाएको उनको भनाई छ । 

शुक्रबार सर्वोच्च अदालत बार एशोसिएशन कानून व्यवसायी महिला समिति तथा नेपाल महिला एकता समाजको संयुक्त आयोजनामा ‘करणी सम्बन्धी कसुरको कानूनी व्यवस्था, न्यायिक अभ्यास र लैङ्गिक विश्लेषण’ विषयक छलफल कार्यक्रममा बोल्दै उनले पुरुष भन्दा टाढा राखेर महिलाको सुरक्षा हुन्छ भन्ने मूर्खता भएको टिप्पणी गरेकी छन् । 

उनले भनेकी छन्, ‘अपराधीबाट टाढा बसेर वा दुरी बनाएर मात्रै हिंसा तथा अपराध कम हुँदैन । हिंसा चेतनाबाट आउँछ । जबसम्म चेतना अभिवृद्धि हुँदैन तबसम्म यो रोकिँदैन । यात्रामा महिला सुरक्षाको लागि अरु विविध कुराहरू सोच्न भन्दा छुट्टै गाडीको व्यवस्था गर्दिने भन्ने तह पुरानै स्थितिमा फर्किने हो ।’